Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 105 Hüküm no: 51 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa b. Ali ile bacanağı Mustafa Ağa b. Mehmed’in aralarındaki alacak ve kefalet davalarında sulh oldukları Mahmiye-i İstanbul’da Atpazarı kurbünde Manisalı Çelebi Mahallesi ahâlîsinden Osman Ağa b. Ali nâm kimesne meclis-i şer‘-i şerîf-i enverde bacanağı bâ‘isü hâze’l-kitâb Mustafa Ağa b. Mehmed mahzarında ikrâr-ı tâm ve takrîr-i kelâm edip mezbûr Mustafa Ağa zimmetinde cihet-i karz-ı şer‘îden beş yüz guruş ve gāib ani’l-meclis İbrahim Ağa nâm kimesneye olan yüz doksan buçuk guruş deynine dahi bi’l-emr ve’l-kabûl kefîl ve zâmin olduğum cihetle meblağ-ı mezbûru gāib-i mezbûra bi-hükmi’l-kefâle edâ ve teslîm etmemle ciheteyn-i mezbûreteynden altı yüz doksan buçuk guruş hakkım olduğundan mâ‘adâ yine gāib ani’l-meclis Abdurrahman Alaybeyi nâm kimesne zimmetinde işbu yedimde olan iki kıt‘a deyn temessükü mantûkunca hakkım olan sekiz yüz guruşa dahi sen bi’l-emr ve’l-kabûl kefîl ve zâmin olmuşidin deyü min-haysu’l-mecmû‘ bin dört yüz doksan buçuk guruşu taleb ve da‘vâ sudûrunda olduğumda mezbûr Mustafa Ağa dahi bi’l-külliye inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuşidi. El-hâletü hâzihî gāib-i mezbûr Abdurrahman Alaybeyi zimmetinde hakkım olan sekiz yüz guruş kefâletden mezbûr Mustafa Ağa’yı azl ve ihrâc eylediğimden sonra beynimize muslihûn tavassut edip mâ‘adâ müdde‘âm olan altı yüz doksan buçuk guruşdan dahi an-inkâr yüz elli guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan yüz elli guruşu yedinden tamamen ahz u kabz eylediğimden sonra kefâlet-i mezbûreye ve mâ‘adâ müdde‘âm olan meblağîn-i mezbûrînin mâ‘adâsına ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan ben mezbûr Mustafa Ağa’yı ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi bedel-i sulh-ı mezbûra ve târih-i kitâba gelince beynimizde cereyân eden ahz u i‘tâya müte‘allika âmme-i da‘vâdan beni ibrâ ve iskāt etmeğin min-ba‘d birbirimiz ile da‘vâ ve nizâ‘ımız kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti [şehri] Rebî‘ülevvel sene 1143. Şuhûdü’l-hâl: [10b] Abdi Çelebi müezzini Mustafa Halîfe b. Mehmed, el-Hâc Yusuf b. Abdullah, Şehrî Mehmed Çavuş b. ( ), Molla Salih b. ( ), el-Hâc Mahmud b. Hüseyin, İsmail Efendi b. Habib, Ali Ağa b. Osman.