Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 106 Hüküm no: 52 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya v. Esebali’nin Kayserideki evini Hakverdi v. Haçok’a sattığı Mübâya‘a. Fi’l-asl vilâyet-i Anadolu’da Kayseriye kazâsına tâbi‘ Kiçi nâm karyeden olup Mahmiye-i İstanbul’da Büyük Karaman kurbünde müsâfiren sâkin Ağya v. Esebali nâm zimmî meclis-i şer‘-i şerîf-i enverde işbu bâ‘isetü’l-vesîka Hakverdi v. Haçok nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülk ve hakkım olup karye-i mezbûrede vâki‘ bir tarafdan Mihail nâm zimmî menzili ve bir tarafdan Ömer Ağa menzili ve bir tarafdan Osep v. Andon nâm zimmî menzili ve bir tarafdan tarîk-i âm ile mahdûd kış evi tâ‘bir olunur tahtânî bir bâb oda ve bir sofa ve bir çardak ve bir bâb dam çardağını müştemil mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Hakverdi zimmîye yüz kırk guruşa bey‘ ve temlîk ol dahi ber-vech-i muharrer iştirâ ve temellük ve kabûl ettikden sonra semeni olan meblağ-ı mezbûr yüz kırk guruşu mezkûr Hakverdi zimmî yedinden tamamen ahz u kabzeyledim. Fîmâ-ba‘d menzil-i mahdûd-ı mezbûrda alâka ve medhalim kalmayıp merkūm Hakverdi zimmînin mülk ve hakkı olup menzil-i mezbûru mahallinde kabza merkūmu taslît eyledim. Kefe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Saferi’l-hayr sene [1]143. Şuhûdü’l-hâl: Ebûbekir b. es-Seyyid Mehmed, Nakkāş Mehmed Çelebi b. Ali, Mehmed Çelebi b. Abdullah, Mehmed b. Hüseyin, Mehmed Çelebi bölükbaşı, Bedros v. Avadis, Mihail v. Osep, Sinan v. Kikor, Aritun v. Avanis, Serkiz v. Melkon.