Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 106 Hüküm no: 53 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mahmud’un boşandığı eşi Emine bt. Hüseyin’in yanındaki oğlu Süleyman’a nafaka bağlandığı Nafaka. Mahmiye-i İstanbul’da Seferikoz Mahallesi sâkinelerinden olup zâtı ta‘rîf-i şer‘î ile mu‘arrefe olan işbu râfi‘u’l-kitâb Emine bt. Hüseyin nâm hatun meclis-i şer‘-i şerîf-i enverde zevc-i sâbıkı Hasan b. Mahmud nâm kimesne mahzarında takrîr-i kelâm tâ‘bir ani’l-merâm edip mezbûr Hasan’ın firâşından hâsıl ve benden mütevellid hâlâ bi-hakkı’l-hıdâne hacr ve terbiyemde olan işbu sagīr oğlum Süleyman’ın nafaka ve kisveye ihtiyâcı olmağla babası mezbûr Hasan üzerine kıbel-i şer‘den kadr-i kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûr Süleyman’ın nafaka ve kisve-bahâsı’çün babası merkūm Hasan üzerine tarafeynin rızâsıyla târih-i kitâbdan beher yevm ikişer para farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisvesi’çün harc ve sarfa ve lede’l-iktizâ istidâneye ve inde’z-zafer babası mezbûr Hasan üzerine rücû‘a mezbûre Rukiye Hatun’a izin verilmeğin mâ-vaka‘a bi’t-taleb ketb olundu. Fî 29 Safer sene [1]143. Şuhûdü’l-hâl: Ahmed Beşe el-mübâşir, el-Hâc Ahmed b. el-Hâc Ali, Ebûbekir Ağa b. Mahmud, Süleyman Odabaşı b. Ahmed, Mustafa Yazıcı b. el-Hâc Şa‘ban, İsmail Beşe b. Hüseyin, İbrahim b. Mustafa.