Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 107 Hüküm no: 54 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Abdullah ile kocası Ahmed Beşe b. Mehmed’in muhala‘a yoluyla boşandığı Kable’d-duhûl muhâla‘a. Mahmiye-i İstanbul’da Sofular Mahallesi’nde sâkine olup zâtı Hasan Çelebi b. Mehmed ve Mustafa Çelebi b. Mehmed ta‘rîfleriyle mu‘arrefe olan Hanife bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i gayr-ı dâhili işbu bâ‘isetü’l-vesîka Ahmed Beşe b. Mehmed mahzarında ikrâr ve takrîr-i kelâm edip mezbûr Ahmed Beşe ile kable’d-duhûl beynimizde şikāk vâki‘ olmağla zimmetinde mütekarrir ve ma‘kūdun-aleyh beş bin akçe mehr-i müeccelimin nısfı olup şer‘an lâzım gelen iki bin beş yüz akçe üzerinde mezbûr Ahmed Beşe ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezkûru ba‘de’l-kabûl ve mu‘accel olmak üzere makbûzum olan on guruşu mezbûr Ahmed Beşe’ye [11a] geriye red ve teslîm ol dahi yedimden ahz u kabz eylediğinden hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Rebî‘ülevvel sene [1]143. Şuhûdü’l-hâl: İbrahim Çelebi b. Mustafa, Urfalı Mustafa Çelebi, Mehmed Çelebi b. Abdullah.