Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 108 Hüküm no: 56 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İbrahim ile Abdurrahman b. İbrahim’in talâkla boşandıkları Mahmiye-i İstanbul’da Çırakçı Mahallesi sâkinelerinden olup zâtı Mehmed b. Hüseyin ve Mehmed b. İbrahim nâm kimesneler ta‘rîfleriyle mu‘arrefe olan Salih[a] bt. İbrahim nâm hatun meclis-i şer‘-i şerîf-i enverde zevc-i dâhili işbu râfi‘u’l-vesîka Abdurrahman b. İbrahim nâm kimesne mahzarında ikrâr ve takrîr-i kelâm edip mezbûr Abdurrahman zevcim olup târih-i kitâb günü bâyinen beni tatlîk etmekle zimmetinde mütekarrir ve ma‘kūdun-aleyh bin beş yüz akçe mehr-i müeccelim ile nafaka-i iddet ve meûnet-i süknâm için dahi bi’t-terâzî ta‘yîn olunan üç yüz akçe ki cem‘an bin sekiz yüz akçeyi bana def‘ ve teslîm ben dahi yedinden tamamen ahz u kabz edip hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-şehri Rebî‘i’l-evvel li-sene selâse ve erba‘în ve mi’e ve elf. Şuhûdü’l-hâl: Mehmed Kasım b. el-Hâc Hüseyin, İvaz Çelebi b. Abdullah, Mehmed b. Hüseyin, Mehmed b. İbrahim.