Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 108 Hüküm no: 57 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fili bt. Penaki’nin Zoli bt. Zenbil’de olan çocuğu Dakraki için nafaka tayini Mahmiye-i İstanbul’da Fenerkapısı kurbünde Abdi Subaşı Mahallesi’nde sâkine bâ‘isetü hâzihi’l-vesîka Zoli bt. Zenbil nâm Nasrâniye meclis-i şer‘-i şerîf-i enverde takrîr-i kelâm ve bast-ı merâm edip gāibetü ani’l-meclis Fili bt. Penaki nâm Nasrâniye[nin] sadrî oğlu işbu üç aylık Dakraki nâm sagīreyi [sagīri] li-ecli’t-terbiye bana def‘ ve teslîm ben dahi ber-vech-i muharrer ahz u kabz etmemle hâlâ yedimde sagīr-i mezbûrun nafaka ve kisve ve sâir levâzım-ı zarûriyyesi’çün kıbel-i şer‘den akçe farz ve takdîr olunması matlûbumdur dedikde hâkim-i muvakki‘-ı sadr-ı kitâb -tûbâ-lehû ve hüsnü meâb- hazretleri sagīr-i mezbûrun nafaka ve kisve ve sâir levâzım-ı zarûriyyesi’çün anası mezbûre Fili üzerine yevmî on beş akçe farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyyesine harc ve sarf ve lede’l-iktizâ istidâneye ve hîn-i zaferde anası mezbûre Fili’ye rücû‘a mezbûre Zoli’ye izin-birle mâ-vaka‘a bi’t-taleb ketb olundu. Fi’l-yevmi’l-hâmis min-Rebî‘i’l-evvel li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa, Ahmed b. Şa‘ban, Ahmed b. Hasan ve gayruhum.