Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 109 Hüküm no: 58 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman b. Abdullah’ın kocası Osman Beşe b. Ömer’den muhala‘a yoluyla boşandığı Kable’d-duhûl muhâla‘a. Mahmiye-i İstanbul’da Molla Hüsrev Mahallesi’nde sâkine Âişe bt. Osman b. Abdullah nâm hatun tarafından husûs-ı âti’z-zikre vekîl olduğu zât-ı mezkûreyi ma‘rifet-i şer‘iyye ile ârifân Molla Mehmed b. Mustafa ve Ali Beşe b. İbrahim [nâm] kimesne[ler] şehâdetleriyle sâbit ve sübût-ı vekâletine hükm-i şer‘î lâhık olan Ahmed b. Osman nâm kimesne meclis-i şer‘-i hatîr-i lâzımü’t-tevkīrde râfi‘-i hâzihi’l-vesîka Osman Beşe b. Ömer nâm kimesne mahzarında takrîr-i kelâm ve bast-ı merâm edip bundan akdem müvekkilem mezbûre nefsini bin beş yüz akçe mehr-i müeccele tesmiyesiyle merkūm Osman Beşe’ye tezvîc edip ol dahi ber-vech-i muharrer tezevvüc ve kabûl etmişidi. Hâlâ kable’d-duhûl beynlerinde şikāk vukū‘una binâen mehr-i mezkûrun nısfı olan yedi yüz elli akçe ile müvekkilem mezbûre mâlından bedel-i hul‘ olmak üzere merfû‘u olan dört guruş üzerlerine mezbûr Osman Beşe ile bi’l-vekâle muhâla‘a-i sahîha-i şer‘iyye [11b] ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan bi’l-vekâle mezbûr Osman Beşe’nin zimmetini ibrâ ve iskāt eylediğimde ol dahi kezâlik hukūk-ı zevciyyete müte‘allika da‘vâdan müvekkilem mezbûrenin zimmetini ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘ülevvel sene 1143. Şuhûdü’l-hâl: Mehmed Halîfe b. Mustafa, Ahmed b. Hasan muhzır, Ali Beşe b. İbrahim, Mehmed Çelebi b. Abdullah, İbrahim b. Mustafa Kādızâde.