Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 110 Hüküm no: 59 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ebûbekir Çelebi’nin Sekbanbaşı İbrahimağa Mahallesi’ndeki arsasını sattığı İki yüz guruşa mübâya‘a-i arsa-yı hâliye. Mahmiye-i İstanbul’da Kırkçeşme kurbünde vâki‘ Sekbanbaşı İbrahimağa Mahallesi’nde sâkin el-Hâc Ebûbekir b. Halil b. Ahmed tarafından husûs-ı âti’z-zikri ikrâra vekîl olduğu Mehmed Efendi b. el-Hâc Ahmed ve el-Hâc Ahmed b. Yusuf şehâdetleriyle şer‘an sâbit olan eş-Şeyh İsmail Efendi b. eş-Şeyh Mustafa Efendi meclis-i şer‘-i şerîf-i enverde müvekkil-i merkūmun oğlu olup kendi tarafından asl ve zevcesi Emine bt. Mehmed Efendi b. Mustafa nâm hatun tarafından tasdîka vekîl olduğu zâtı mezbûreyi ma‘rifet-i şer‘iyye ile ârifân Mehmed Efendi b. el-Hâc Ahmed ve el-Hâc Ahmed b. Yusuf şehâdetleriyle sâbit olan işbu bâ‘isü’l-kitâb Abdullah Çelebi b. el-Hâc Ebûbekir mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkil-i merkūm el-Hâc Ebûbekir’in yedinde mülk ve hakkı olup mahmiye-i mezbûrede Muhtesib Karagöz Mahallesi’nde vâki‘ bir tarafdan Beypaşa odaları ve bir tarafdan Hüseyin Ağa menzili ve bir tarafdan İncili Çavuş odaları ve bir tarafdan tarîk-i âm ile mahdûd ve senede üç yüz altmış akçe mukāta‘a-i kadîmesi olup iki aded su kuyusu ve bir zîr-i zemîn mezbûr Hüseyin Ağa tarafında vâki‘ müşterek taş duvarı müştemil arsa-yı hâliyesini bey‘-i bâtt-ı sahîh-i şer‘î ile merkūm Abdullah Çelebi ve zevcesi müvekkil-i mezbûre Emine Hatun’a ale’l-iştirâki’s-seviyy iki yüz guruşa bey‘ ve teslîm ve temlîk onlar dahi ber-vech-i muharrer iştirâ ve tesellüm ve temellük ve kabz ve kabûl ettiklerinden sonra semeni olan meblağ-ı mezbûr iki yüz guruşdan mezbûrân Abdullah Çelebi ve zevcesi merkūme Emine Hatun’un zimmetlerini ibrâ-i âm ile ibrâ ve iskāt eyledi müvekkil-i merkūm el-Hâc Ebûbekir’in arsa-yı mahdûd-ı mezbûrede kat‘â alâka ve medhali kalmayıp ber-vech-i muharrer mezbûrânın mülk ve hakkı olmuşdur. Keyfemâ-yeşâ’ân ve yahtârân mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-sene selâse ve erba‘în ve mi’e ve elf. Şuhûdü’l-hâl: Umdetü’l-mevâliyyi’l-izâm sâbıkā Üsküdar kādısı Ali Efendi, Ali Efendi b. Abdullah, Yusuf b. Süleyman, İbrahim b. Yusuf, İbrahim b. el-Hâc Mehmed, Ahmed Yazıcı b. Abdullah, el-Hâc Salih b. Hüseyin.