Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 110 Hüküm no: 60 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Mehmed ile Yahûdi İshak v. İlya’nın aralarındaki alacak davasında sulh oldukları Sulh. Mahmiye-i İstanbul’da el-Hâc İlyas Mahallesi’nde sâkin değirmenci tâife[sinden] Süleyman b. Mehmed nâm kimesne meclis-i şer‘-i hatîr-i lâzımü’t-tevkīrde râfi‘-i hâzihi’l-vesîka Burunsuz İshak v. İlya nâm Yahûdi muvâcehesinde ikrâr-ı tâm ve takrîr-i kelâm edip târih-i kitâbdan on iki sene mukaddem mezbûr İshak’a eşyâ-i memlûkemden elli guruşa bey‘ ve teslîm eylediğim on iki miskāl bir çift altın bilezik semeni ile cihet-i karzdan elli guruş ki cem‘an yüz guruş hakkımı merkūm İshak’dan da‘vâya tasaddî eylediğimde ol dahi ba‘de’l-inkâr ve vukū‘ı’l-münâza‘a beynimize muslihûn tavassut edip da‘vâ-yı mezkûra beni on guruş üzerine inşâ-i akd-i sulh eylediklerinde ben dahi ba‘de’l-kabûl bedel-i sulh olan meblağ-ı mezbûr on guruşu merkūm İshak Yahûdi yedinden tamamen ahz ü kabz eylediğimden sonra husûs-ı mezkûra ve bedel-i merkūma müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, İbrahim b. Mustafa Kādızâde, Ya‘kub b. Abdullah, Ahmed Çelebi b. Hasan muhzır.