Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 111 Hüküm no: 61 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahadır Giray Sultan’ın Yahûdi Salamon ile David’e olan borcuna Ali Ağa’nın kefil olduğu Medîne-i Üsküdar’a tâbi‘ Kuzguncuk karyesi ahâlîsinden râfi‘u’l-vesîka Salamon v. İsak nâm Yahûdi ile Galata kazâsına tâbi‘ Ortaköy ahâlîsinden David v. Yasef nâm Yahûdiler meclis-i şer‘-i şerîf-i enverde sâbıkā hadîka-i hâssa bostanı hasekilerinden Ali Ağa b. Abdurrahman mahzarında her biri üzerine da‘vâ ve takrîr-i kelâm edip gāib ani’l-meclis Bahadır Giray Sultan zimmetinde cihet-i deyn-i şer‘iyyeden üç bin yüz elli guruş hakkımıza merkūm Ali Ağa bi’l-emr ve’l-kabûl kefâlet-i sahîha-i şer‘iyye ile kefîl olmağla binâen-aleyh meblağ-ı merkūmdan iki bin guruşunu bizlere teslîm biz dahi yedinden kabz ve tesellüm etmekle bâkī kalan bin yüz elli guruşu dahi kefâletine binâen merkūm Ali Ağa’dan taleb ederiz edâsına tenbîh olunmak murâdımızdır dediklerinde gıbbe’s-suâl merkūm Ali Ağa cevâbında fi’l-vâki‘ müdde‘iyân-ı mesfûrânın gāib ani’l-meclis Bahadır Giray Sultan zimmetinde cihet-i deyn-i şer‘îden [12a] hakkı olan üç bin yüz elli guruş haklarını bi’l-emr ve’l-kabûl kefîl olduğunu ikrâr lâkin meblağ-ı mecmû‘-ı mezbûrdan bir def‘a bin altı yüz elli guruş ve bir def‘a dahi bin beş yüz guruşunu müdde‘iyân-ı merkūmâna bin yüz kırk senesi Rebî‘ülâhiri’nin ibtidâsında tamamen edâ ve teslîm eyledim deyü def‘le mukābele edicek gıbbe’l-istintak merkūmân Salamon ve David cevâblarında merkūm Ali Ağa bin yüz kırk iki senesi Saferi’l-hayrı’nın yirminci günü meblağ-ı mezbûr bin yüz elli guruşu cihet-i kefâletden bize zimmetinde vâcibü’l-edâ ve lâzımü’l-kazâ deyni olduğunu ikrâr ve işhâd eyledi deyü def‘le mukābele edicek gıbbe’l-istintak ve’l-inkâr müdde‘iyân-ı merkūmândan da‘vâlarına mutâbık beyyine taleb olundukda udûl-i ahrâr-ı ricâl-i Müslimînden olup mahmiye-i İstanbul’da Mahmudpaşa Mahallesi ahâlîsinden Mehmed Ağa b. Ali ve Molla Gürânî Mahallesi ahâlîsinden olup Vâlidehanı’nda kâtib Yusuf b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu Ali Ağa târih-i kitâb şehrinin yirminci günü müdde‘iyân-ı merkūmân Salamon ve David Yahûdilerin Bahadır Giray Sultan zimmetinde cihet-i deyn-i şer‘îden hakkı olan üç bin yüz elli guruşa bi’l-emr ve’l-kabûl kefîl olmuşidim meblağ-ı mezbûrdan iki bin guruşu kendilere edâ ve teslîm eyledim hâlâ zimmetimde bâkī bin yüz elli guruş cihet-i kefâletden merkūmân Salamon ve David Yahûdilere vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 24 Safer sene [1]143. Şuhûdü’l-hâl: Abdullah Efendi Musazâde, Mustafa Ağa el-mübâşir, ayak nâibi Mehmed Efendi, Mehmed Çelebi kethüdâ-yı muhzırân, Muhzır Salih Çelebi b. Süleyman, Hazînedâr el-Hâc Mehmed, Abdullah Efendi b. Ahmed Efendi, Abdullah Efendi Eminzâde, Kahveci Süleyman.