Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 112 Hüküm no: 62 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Salamon ile David’e olan borcunu ödemesi için Ali Ağa’ya tenbih olunması Bâ-imzâ-i hazret-i efendi, haseki Çoban Ali Ağa’ya müte‘allik. Medîne-i Üsküdar’a tâbi‘ Kuzguncuk karyesi ahâlîsinden râfi‘u’s-sifr Salamon v. İsak nâm Yahûdi ile Galata muzâfâtından Ortaköy ahâlîsinden David v. Yasef nâm Yahûdiler meclis-i şer‘-i şerîf-i enverde sâbıkā hadîka-i hâssa bostanı hasekilerinden Ali Ağa b. Abdurrahman nâm kimesne mahzarında her biri üzerine da‘vâ ve takrîr-i kelâm edip merkūm Ali Ağa yedimizde olan mu‘anven ve mersûm deyn temessükü mantûkunca yedimizden iki bin guruş istikrâz ve kabz ve mesârifine sarfla istihlâk edip hattâ merkūm Ali Ağa meblağ-ı mezbûr-ı cihet-i merkūmdan zimmetinde vâcibü’l-edâ ve lâzımü’l-kazâ deyni olduğunu huzûr-ı Müslimînde kirâren ve mirâren ikrâr ve istişhâd dahi etmişiken taleb eylediğimizde edâda ta‘allül eder suâl olunup meblağ-ı mezbûr iki bin guruşun edâsına merkūm Ali Ağa’ya tenbîh olunmak murâdımızdır dediklerinde gıbbe’s-suâl merkūm Ali Ağa cevâbında fi’l-vâki‘ temessük-ı merkūm kendinin olup ve meblağ-ı mezbûr iki bin guruş cihet-i merkūmeden müdde‘iyân-ı mesfûrâna zimmetimde vâcibü’l-edâ deynimdir deyü ikrâr eylediğini ikrâr lâkin merkūmân yedlerinden bir akçe ve bir habbe kabz ve tesellüm etmedi[ği]n ikrâr edip ikrâr-ı mezkûremde kâzibim deyicek mukırr-ı merkūm Ali Ağa müdde‘iyân-ı mesfûrâna iki bin guruş cihet-i karzdan ikrârına kâzib ve kendileri dahi da‘vâ-yı mezkûrelerine mübtil olmadıklarına şer‘an müdde‘iyân-ı merkūmân Salamon ve David’e yemîn tevcîh etmekle vech-i meşrûh üzere yemîn teklîf olunduklarında onlar dahi her biri alâ-vefkı’l-mesûl yemîn bi’llâhillezî enzele’t-Tevrât alâ-Musa -aleyhi’s-salâtü ve’s-selâm- etmeğin mûcebiyle ba‘de’l-hükm meblağ-ı mezbûr iki bin guruşu müdde‘iyân-ı merkūmân Salamon ve David Yahûdilere edâya merkūm Ali Ağa’ya tenbîh olunup mâ-vaka‘a bi’t-taleb ketb olundu. Fî 24 Safer sene [1]143. Şuhûdü’l-hâl: Abdullah Efendi b. Ahmed Efendi, fahrü’l-akrân Mustafa Ağa, ayak nâibi Mehmed Efendi, Mehmed Çelebi kethüdâ-yı muhzırân, Salih Çelebi b. Süleyman, Abdullah Efendi Eminzâde, el-Hâc Mehmed Ağa hazînedâr.