Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 114 Hüküm no: 64 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abram v. Haçador’un nişan için Ağya bt. Kabril’e verdiği eşyalarını nişanın bozulmasıyla geri aldığı Bâ-imzâ-i hazret-i efendi. Mahmiye-i İstanbul’da Bâlipaşa Mahallesi ahâlîsinden meremmâtcı Abram v. Haçador nâm zimmî meclis-i şer‘-i şerîf-i enverde mahalle-i mezbûre ahâlîsinden râfi‘u’s-sifr Gabril v. Avram nâm zimmî muvâcehesinde ikrâr ve takrîr-i kelâm edip bundan akdem merkūm Gabril kebîre kızı Ağya nâm Nasrâniyeyi bana tezvîce va‘ad eyledikde ben dahi gāib ani’l-meclis Papa Bogos nâm zimmî yediyle nişan olmak üzere beynimizde ma‘lûm ba‘zı emti‘a vermişidim el-hâletü hâzihî merkūme Ağya Nasrâniye nefsini bana tezvîcden imtinâ‘ etmekle ben dahi gāib-i merkūm Papa Bogos yediyle nişan olmak üzere medfû‘um olan beynimizde ma‘lûm emti‘ayı tamamen ve kâmilen ahz ü kabz edip âmme-i de‘âvî ve mütâlebât ve eymân-ı muhâsamâtdan merkūme Ağyan Nasrâniye ile babası mesfûr Gabril zimmînin zimmetlerin ibrâ ve iskāt eyledim min-ba‘d merkūmân ile da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Safer sene [1]143. Şuhûdü’l-hâl: Mehmed Çavuş b. İbrahim, Süleyman Çavuş b. Mehmed, Ali Ağa b. Mustafa, Kassâbzâde Ali Ağa, Ali Ağa b. el-Hâc Yusuf kapıkethüdâsı, Serkiz v. Papas, Karabet v. Yasef, Arakir v. Şirvan, Annan? v. Sefer, Haçir v. Zülüf.