Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 115 Hüküm no: 65 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın eşi Mustafa b. Hasan ile muhala‘a yoluyla boşandıkları Muhâla‘a. Mahmiye-i İstanbul’da Hocapaşa Mahallesi sâkinelerinden olup zâtı es-Seyyid Ahmed b. Hasan ve Mehmed b. İbrahim nâm kimesneler ta‘rîfleriyle mu‘arrefe olan Safiye bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i dâhili râfi‘u’l-vesîka Mustafa b. Hasan nâm kimesne mahzarında takrîr-i kelâm ve bast-ı merâm edip mezbûr Mustafa ile beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh iki bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a olduğumda ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan ben mezbûr Mustafa’nın zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi kezâlik hukūk-ı zevciyyete müte‘allika âmme-i da‘vâdan benim zimmetimi ibrâ-i âmm-ı râfi‘u’l-hısâm ile ibrâ ve iskāt eyledi. Fîmâ ba‘d birbirimiz ile bi-vechin mine’l-vücûh da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Ya‘kub b. Abdullah, İbrahim b. Mustafa Kādızâde, Ahmed b. Hasan, es-Seyyid Ahmed muhzır, Kadrizâde Efendi.