Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 115 Hüküm no: 66 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger İstavri v. Panayot ile Dizo v. Nikola’nın aralarındaki alacak davasında anlaştıkları Sulh. Mahmiye-i İstanbul’da hısnı ebvâbından Eğrikapı dâhilinde vâki‘ Avcıbey Mahallesi sükkânından işbu râfi‘u’l-vesîka Dülger İstavri v. Panayot nâm zimmî meclis-i şer‘-i şerîf-i enverde Dizo v. Nikola nâm zimmî muvâcehesinde ikrâr ve takrîr-i kelâm edip mezbûr Dizo zimmetinde cihet-i karz-ı şer‘îden yirmi üç guruş hakkım olup meblağ-ı mezbûrun yirmi guruşunu bundan akdem bana edâ ve teslîm ben dahi yedinden ahz u kabz edip zimmetinde üç guruş hakkım bâkī kalmağla meblağ-ı bâkī-i mezbûru mezbûr Dizo’dan taleb ve da‘vâ sadedinde olduğumda ol dahi benden cihet-i karz olmak üzere yirmi iki guruş hakkım vardır deyü da‘vâ etmekle beynimize muslihûn tavassut edip da‘vâ-yı mezkûremden beni mesfûr Dizo ile iki guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru mezbûr Dizo zimmî yedinden tamamen ahz u kabz eylediğimden sonra husûs-ı mezkûra müte‘allika âmme-i da‘vâdan mesfûr Dizo’nun zimmetini ibrâ-i âm ile ibrâ ve iskāt eylediğimde ol dahi benden iddi‘â eylediği yirmi iki guruş da‘vâsından benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa Ağa, Ahmed Çelebi b. Hasan, Salih Çelebi b. Süleyman, el-Hâc Mustafa b. es-Seyyid Ömer, Sarımsakçızâde Ahmed Çelebi, Todori v. Dimitri, Andon v. Mihal, Petro kalfa, Todorine v. Dimitri.