Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 116 Hüküm no: 67 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ali Efendi b. Ali’nin vakıf olan arsa çevresindeki taş duvarını Ahmed Efendi’ye sattığı Bâ-imzâ-i hazret-i efendi, mübâya‘a ( ) ve arsası tevcîh. Mahmiye-i İstanbul’da Demirhâne Mahallesi’nde vâki‘ iki tarafdan Sarı Ahmed Paşa veresesi mülkleri ve iki tarafdan tarîk-i âm ile mahdûd menzil arsasının etrâf-ı erba‘asında olan taş duvarı Hâfız Ali Efendi b. Ali nâm kimesnenin yedinde olan hüccet-i şer‘iyye mantûkunca mülkü ve arsa-yı sırfası merhûm el-Hâc Mehmed Efendi nâm sâhibü’l-hayrın ulemâya meşrûta vakfı olmağla tevcîh-i hâkimü’ş-şer‘le yine merkūm Hâfız Ali Efendi’nin tasarrufunda olduğu bâ-hüccet-i şer‘iyye müte‘ayyin oldukdan sonra merkūm Hâfız Ali Efendi meclis-i şer‘-i şerîf-i lâzımü’t-teşrîfde işbu râfi‘u’l-kitâb Ahmed Efendi b. ( ) tarafından tasdîka vekîl-i şer‘îsi olan Ahmed Efendi b. Mustafa mahzarında ikrâr ve takrîr-i kelâm edip arsa-yı mezbûrenin etrâf-ı erba‘asında olup mülküm olan taş duvarı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Ahmed Efendi’ye dört yüz guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr dört yüz guruşu yedlerinden ahz u kabz ve tesellüm eyleyip ve arsasını dahi merkūm Ahmed Efendi’ye kasr-ı yed eyledim dedikde gıbbe’t-tasdîkı’ş-şer‘î arsa-yı mahdûde-i mezbûreyi dahi ber-mûceb-i şart-ı vâkıf hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri mezbûr Ahmed Efendi’ye kıbel-i şer‘den tevcîh etmeğin mâ-vaka‘a bi’t-taleb ketb olundu. Fî 5 Rebî‘ülevvel sene [1]143. Şuhûdü’l-hâl: Mehmed Ağa b. Yusuf, Mehmed Efendi b. Mustafa, el-Hâc Süleyman b. Abdullah, Osman Bey b. Ömer, Ebûbekir Efendi tâbi‘-i Dâmâdzâde, Salih Çelebi muhzır, Mustafa Çelebi kethüdâ-yı muhzırân.