Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 117 Hüküm no: 69 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc İsmail Ağa b. Ahmed’in vasiyeti Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ es-Seyyid Fazlullah Efendi b. el-merhûm Abdülkerim Efendi Mahmiye-i İstanbu[l’da] Kiçihatun Mahallesi’nde el-Hâc Salih Ağa b. [Abd]ullah’ın sâkin olduğu menzile varıp zeyl-i sahîfede muharrerü’l-esâmî Müslimîn huzûrunda akd-i meclis-i şer‘-i nebevî ettikde yine Mahmiye-i mezbûrda mahalle-i mezkûreye karib Ahmedkethüdâ Mahallesi ahâlîsinden el-Hâc İsmail Ağa b. Ahmed b. Abdullah nâm kimesne meclis-i ma‘kūd-ı mezkûrda âhiret kızı olup zâtı ta‘rîf-i şer‘î ile mu‘arrefe olan mûmâ-ileyh Salih Ağa’nın zevce-i menkûhası bâ‘isetü hâzihi’l-vesîka Rukiye bt. Abdullah nâm hatun mahzarında ikrâr-ı tâm ve takrîr-i kelâm edip ben bi-emri’llâhi te‘âlâ vefât ettiğimde cümle terekem ahz u kabz ve sünnet-i seniyye üzere techîz ve tekfîn ve levâzım ve defnim görüldükden sonra terekemin sülüsü ifrâz ve sülüs-i mezbûrdan beş bin akçe ıskāt-ı salâtım için vech-i şer‘î üzere fukarâya devr oluna ve yine sülüs-i mezbûrdan yüz guruş ile onar guruş hediyeli on Mushaf-ı şerîf iştirâ olunup her biri talebe-i ulûmdan birer müstahik kimesneye verile ve yine sülüs-i mezbûrdan yüz guruş ile mezârıma dikilip fazlası ile eyyâm-ı mu‘tâdede tabh-ı ta‘âm ve it‘âm-ı fukarâ oluna ve sülüs-i mezbûrdan nesne bâkī kalır ise kendi dilediği umûruna harc ve sarf ede ve mâ‘adâ sülüsân terekemi li-ebeveyn kız karındaşım olup hasren vârisem olan hemşîrem Âişe bî-zebân olup umûrunu rü’yet ve ikāmete kādire olmadığı ecilden bi’l-vesâye ahz u kabz ve umûrunu rü’yet ve ikāmet ede deyü vasiyyet ve tenfîzine mezbûre Rukiye Hatun’u vasiyy-i muhtâr nasb ve ta‘yîn eylediğimde ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mehmed Çelebi b. Ali ve muhzır Mehmed b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 6 Rebî‘ülevvel sene [1]143. Şuhûdü’l-hâl: Nâzır es-Seyyid Mehmed Ağa b. Ahmed, İshak Çelebi b. Abdullah ve Hasan b. Hüseyin ve Mehmed Çelebi b. Mustafa ve Mustafa b. Hüseyin ve Mehmed b. Ali.