Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 118 Hüküm no: 70 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Blaşe bt. Danyel’in bir bab odayı babasının kendisine hibe ettiğini şahitler huzurunda ispat ettiği Hibe, bâ-imzâ-i hazret-i efendi. Mahmiye-i İstanbul’da Altımermer kurbünde Yenimahalle sâkinelerinden râfi‘atü’l-vesîka Blaşe bt. Danyel nâm Nasrâniye meclis-i şer‘-i şerîf-i enverde babası merkūm Danyel muvâcehesinde üzerine da‘vâ ve takrîr-i kelâm edip babam merkūm Danyel yedinde mülk ve hakkı olup mahalle-i merkūmede vâki‘ bir tarafdan Hazrosondar? veresesi mülkleri ve iki tarafdan Hüseyin Efendi Vakfı ve bir taraf-ı râbi‘i tarîk-i âm ile mahdûd menzilde tarîk-i âm tarafında vâki‘ bir bâb tahtânî odasını târih-i kitâbdan sekiz sene mukaddem mülkünden ifrâz ve bana hibe-i sahîh-i şer‘î ile hibe ve temlîk ve teslîm eyledikde ben dahi meclis-i hibede ittihâb ve temellük ve tesellüm ve kabz ve kabûl edip zikr olunan bir bâb fevkānî ve bir bâb tahtânî oda mülk-i mevhûbum olmuş iken babam merkūm Danyel bi-gayr-ı vech-i şer‘î mu‘âraza ve müdâhale eder suâl olunup men‘ olunması matlûbumdur dedikde gıbbe’s-suâl merkūm Danyel cevâbında fi’l-vâki‘ zikr olunan odalarda mu‘âraza ve müdâhalesini ikrâr lâkin hibe-i merkūmeyi bi’l-külliye inkâr edicek müdde‘iyye-i merkūme Blaşe Nasrâniyeden da‘vâsına mutâbık beyyine taleb olundukda mahalle-i merkūme ahâlîsinden olup udûl-i Müslimînden es-Seyyid İbrahim b. es-Seyyid Derviş Ağa nâm kimesne ile beynlerinde udûlden Anton v. Hadros ve Yani v. Hristo nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu merkūm Danyel zimmî zikr olunan İstanbul’da Altımermer kurbünde Yenimahalle’de vâki‘ bir tarafdan [14a] Hazrosondar? veresesi mülkleri ve iki tarafdan Hüseyin Efendi Vakfı ve bir tarafdan tarîk-i âm ile mahdûd mülk menzilde tarîk-i âm tarafında olan bir bâb fevkānî ve bir bâb tahtânî odasını târih-i kitâbdan sekiz sene mukaddem bizim huzûrumuzda mülkünden ifrâz ve kızı müdde‘iyye-i merkūme Blaşe Nasrâniyeye hibe-i sahîh-i şer‘iyye ile hibe ve temlîk ve teslîm ol dahi meclis-i hibede ittihâb ve temellük ve tesellüm ve kabz ve kabûl etmişidi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm merkūm Danyel zimmî mu‘ârazadan men‘-birle mâ-vaka‘a bi’t-taleb ketb olundu. Fî 5 Rebî‘ülevvel sene [1]143. Şuhûdü’l-hâl: Abdullah Efendi Musazâde, Abdullah Efendi Eminzâde, Salih Çelebi b. Süleyman, Mehmed Çelebi kethüdâ-yı muhzırân, Abdullah Efendi b. Ahmed, el-Hâc Mehmed Efendi.