Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 60 Hüküm no: 50 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül bt. Mıgırdıç’ın yarım hisse bahçesini kardeşine sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkine olup şahsı zeyl-i vesîkada muharrerü’l-esâmi kimesneler ta‘rîfleriyle mu‘arrefe olan Gül bt. Aci Mıgırdıç Nasrâniye meclis-i şer‘-i hatîr-i lâzimü’t-tevkīrde li-ebeveyn kız karındaşı olup şahsı kezâlik mu‘arrefe olan işbu râfi‘atü’r-rakīm Deniye Nasrâniye muvâcehesinde bi-tav‘ihâ ikrâr ve takrîr-i kelâm edüp zikri âtî vukū‘ına değin yedimde mülk-i mevrûsem olup kasaba-i mezbûrede <> toprağında Draman kurbünde vâki‘ bir tarafı Aci Baron bağı ve bir tarafı Tavşanbağı ve bir tarafı İsayi zimmî bostanı ve bir tarafı tarîk-i âm ile mahdûd ve tahmînen üç dönüm bir kıt‘a ve kuyu taşı duvarlı vişne mülk bahçesinin nısfı benim ve nısf-ı âharı mesfûre Deniye’nin olmağla el-hâletü hâzihi ben bahçe-i mezkûrede olan nısf hisse-i şâyi‘amı meccânen mesfûre Deniye’ye temlîk ve teslîm eylediğimde ol dahi temellük ve tesellüm ve kabz u kabûl eyledikden sonra mesfûre Deniye’ye on beş guruş dahi i‘tâ edüp ol dahi mukābelesinde mârrü’z-zikr bahçenin derûnunda olan su kuyusunun suyu ile nısfiyyet üzere bana temlîk, ben dahi temellük ve kabûl eyledim lâkin kuyu-yı mezkûrun vaktinde suyunu benim ol mahâlle karîb bostanıma icrâya bahçe-i mezkûrun derûnundan Serkisoğlu bostanından mesfûre Deniye’nin âhar çavuş bağının hendeğinden nakl ve bostanımı suvarmak üzere ve kuyu-yı mezkûrun nısfını bana temlîk etmek üzere her birimiz ta‘ahhüd ve zabt u rabt edüp takrîrlerimiz tescîl ve hüccet olunup yedlerimize i‘tâ olunmak matlûbumuzdur dedikde gıbbe’t-tasdîkı’l-mu‘ayyene mâ-hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min-Cemâziyelâhir li-sene tis‘a ve seb‘în ve mi’ete ve elf. Şuhûdü’l-hâl: Voyvoda Süleyman Ağa, Voyvoda-i sâbık Ahmed Ağa, Serdâr Mehmed Ağa b. Ali, el-Hâc Mahmud Ağa, Kara Ahmed b. Mehmed. Değirmenci Kirkor, Ohan, Demirci Agop Dikici Avak, İnegöllü ...?