Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 123 Hüküm no: 77 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa ile Mehmed b. Abdülkerim b. Abdurrahman’ın muhala‘a yoluyla boşandıkları Muhâla‘a. Mahmiye-i İstanbul’da Hızırbey Mahallesi sâkinelerinden olup zâtı Abdurrahman Beşe b. el-Hâc Mahmud ve Murad Beşe b. Ca‘fer nâm kimesneler ta‘rîfleriyle mu‘arrefe olan Âişe bt. Mustafa nâm hatun meclis-i şer‘-i şerîf-i enverde zevc-i dâhili bâ‘isü’l-kitâb Mehmed b. Abdülkerim b. Abdurrahman tarafından husûs-ı âti’z-zikre vekîl olduğu mahalle-i mezbûre müezzini el-Hâc Hüseyin Halîfe b. Abdullah ve Murad Beşe b. Ca‘fer şehâdetleriyle sâbit olan Halil Çelebi b. Mustafa nâm kimesne mahzarında ikrâr ve takrîr-i kelâm edip müvekkil-i mezbûr Mehmed zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh yedi yüz yirmi akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere vekîl-i mezbûr ile muhâla‘a-i sahîha-i şer‘iyye ile muhâla‘a eylediğimde ol dahi bi’l-vekâle hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan zevcim müvekkil-i mezbûrun zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 Rebî‘ülevvel sene [1]143. Şuhûdü’l-hâl: Mehmed b. Abdullah, İbrahim b. Mustafa, Abdullah b. Mustafa, Salih b. Süleyman.