Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 124 Hüküm no: 78 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Salih’in boşandığı eşi Ayşe bt. Hasan’dan olan oğlu Mustafa’ya nafaka ödemesi Medîne-i Hazret-i Ebû Eyyüb el-Ensârî -radiye anhu Rabbihi’l-Bârî- mahallâtından Otakçılar Mahallesi sâkinelerinden olup zâtı Ahmed b. Mustafa ve İbrahim Çelebi b. Mustafa nâm kimesneler ta‘rîfleriyle mu‘arrefe olan bâ‘isetü hâzihi’l-vesîka Âişe bt. Hasan nâm hatun meclis-i şer‘-i şerîf-i enverde zevc-i sâbıkı Ahmed Beşe b. Salih nâm kimesne mahzarında takrîr-i kelâm ve bast-ı merâm edip mezbûr Ahmed Beşe’nin firâşından hâsıl ve benden mütevellid ve bi-hakkı’l-hıdâne hâlâ hacr ve terbiyemde olan işbu Mustafa nâm sagīrin mâlı olmayıp nafaka ve kisveye ihtiyâcı olmağın babası mezbûr [15b] Ahmed Beşe üzerine kıbel-i şer‘den kadr-i ma‘rûf akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûrun nafaka ve kisve ve sâir levâzım-ı zarûriyyesi’çün babası mezbûr Ahmed üzerine bi’t-terâzî târih-i kitâbdan yevmî ikişer para farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer babası mezbûr Ahmed Beşe üzerine rücû‘a mezbûre Âişe Hatun’a izin vermeğin mâ-vaka‘a bi’t-taleb ketb olundu. Fî 10 Rebî‘ülevvel sene [1]143. Şuhûdü’l-hâl: es-Seyyid Ahmed Çelebi b. Mustafa, İbrahim Çelebi b. Mustafa, Mehmed b. Ahmed, Abdullah b. Ali, Ömer Çelebi b. Mehmed, Mehmed Çelebi b. Abdullah.