Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 124 Hüküm no: 79 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan ile kocası İsmail b. eş-Şeyh Mustafa b. Ali’nin muhala‘a yoluyla boşandıkları Muhâla‘a. Vilâyet-i Anadolu’da vâki‘ Gölpazarı-ı Bolu kazâsına tâbi‘ Muslihiddingerişi nâm karye sâkinelerinden Fâtıma bt. Hasan b. Osman nâm bikr-i bâliğanın babası ve tarafından hul‘-ı âti’z-zikre vekîl olduğu yine karye-i mezbûre ahâlîsinden olup zât-ı mezbûreyi bi’l-mu‘arrefeti’ş-şer‘iyye ârifân olan Hüseyin b. Şa‘ban ve Ahmed b. Veli nâm kimesneler şehâdetleriyle şer‘an sâbit olan mezbûr Hasan meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i gayr-ı dâhili İsmail b. eş-Şeyh Mustafa b. Ali tarafından dahi kezâlik vekîl olduğu şâhidân-ı mezbûrân şehâdetleriyle sâbit ve sübût-ı vekâletine hükm-i şer‘î lâhık olan babası bâ‘isü hâze’l-kitâb merkūm eş-Şeyh Mustafa Efendi mahzarında bi’l-vekâle ikrâr-ı tâm ve takrîr-i kelâm edip kızım müvekkile-i mezbûre Fâtıma zevci müvekkil-i merkūm İsmail Bey ile hüsn-i imtizâc mümkün olmayıp duhûl dahi bulunmamağla kable’d-duhûl lâzım gelen nısf mehri olan iki yüz yirmi akçe üzerine vekîl-i merkūm ile bi’l-vekâle muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharı bi’l-vekâle ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 11 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Mustafa b. İbrahim, Mehmed b. Ahmed.