Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 125 Hüküm no: 80 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Geliri Kilise Fukarası Avarızları Vakfı’na ait arsanın Kasap İstayko v. İstanko’ya kiraya verilmesi Mahmiye-i İstanbul’da Ortakapısı kurbünde Sarmaşık Mahallesi’nde vâki‘ Kasiha? kenîsesi fukarâsı avârızları vakfına bi’l-fi‘il mütevellî olan Sava v. Andreya nâm zimmî meclis-i şer‘-i şerîfde râfi‘-i hâze’s-sifr Kasab İstayko v. İstanko zimmî muvâcehesinde bi’t-tevliye ikrâr ve takrîr-i kelâm edip vakf-ı mezbûr müsakkafâtından olup mahalle-i mezbûrede vâki‘ bir tarafdan kaliçeci Ali Çelebi menzili ve bir tarafdan Manol zimmî menzili ve iki tarafdan tarîk-i âm ile mahdûd bir bi’r-i mâ’yı muhtevî vakıf menzil arsası icâreteyn-i ma‘lûmeteyn ile âhara îcâr cânib-i vakfa evlâ olduğuna binâen arsa-yı mezbûre tâlibine arz olundukda iki yüz seksen guruş mu‘accel ve ayda on beş akçe müeccel ile mezbûr İstayko üzerinde karâr edip ziyâde ile tâlib-i âhar zuhûr etmemeğin arsa-yı mezkûreyi ber-vech-i muharrer iki yüz seksen guruş mu‘accel ve ayda on beş akçe müeccel ile mezbûr İstayko’ya bi’t-tevliye îcâr ve teslîm eylediğimde ol dahi minvâl-ı muharrer üzere istîcâr ve tesellüm ve ba‘de’l-kabûl bedel-i mu‘accel-i mezkûr iki yüz seksen guruşu yedinden ahz u kabz ve mesârif-i vakf-ı mezbûra sarfla istihlâk eylediğimden sonra merkūm İstayko bedel-i mezkûra müte‘allika âmme-i da‘vâ mütâlebât ve muhâsamâtdan beni taraf-ı vakf-ı mezbûru ibrâ-i âm ile ibrâ ve iskāt eyledi min-ba‘d arsa-yı mezkûre merkūm İstayko’nun dâhil-i havza-i tasarrufu olup emsâli gibi mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Rebî‘ülevvel sene [1]143. Şuhûdü’l-hâl: Abdullah Efendi b. Halil el-imâm, Eyüb Çelebi b. Ahmed, Mahmud Beşe b. Ahmed, Salih Beşe b. Mehmed, Derzi Mehmed Çelebi b. Abdullah, Mehmed Çelebi b. Molla Salih, Benli Mehmed Çelebi b. Abdullah, Mehmed Çelebi b. Abdullah, Hasan Çelebi b. Ebûbekir, Mehmed Çelebi b. Ebûbekir, İbrahim Ağa b. Mustafa, Ahmed Ağa b. Mustafa, Çorbacı Mustafa Ağa, Mestçizâde Mehmed Çelebi, Osman Çelebi b. Abdullah, Yasef v. Simon, Serkiz v. Simon, Plaş v. ( ), Yorgo v. Keyka, Küçük Yani v. Miho, Yani v. Toçko, Yano v. Toçko, Pono v. Sedef, Vasil v. Dimitri, Kosta v. Argadiye.