Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 126 Hüküm no: 81 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mustafa b. Ahmed’in evini İsmail Beşe b. Mahmud’a sattığı Mübâya‘a. Mahmiye-i İstanbul’da Molla Ahaveyn Mahallesi ahâlîsinden Molla Mustafa b. Ahmed nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka İsmail Beşe b. Mahmud nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan İsmail Çelebi menzili ve iki tarafdan Şerife Rukiye Hatun menzili ve bir tarafdan tarîk-i âm ile mahdûd fevkānî bir bâb oda ve bir sofa ve dehlîz ve tahtânî bir bâb oda ve kenîf ve bir mikdâr havluyu müştemil menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz kırk altı guruşa mezbûr İsmail Beşe’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yüz kırk altı guruşu mezbûr İsmail Beşe yedinden tamamen ahz u kabzeyledim. Fîmâ ba‘d menzil-i mahdûd-ı mezkûr mezbûr İsmail Beşe’nin mülk-i müşterâsı olup benim kat‘â alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Rebî‘ülevvel sene [1]143. Şuhûdü’l-hâl: İmâm Hüseyin Efendi b. Mustafa, Ömer Efendi b. Mustafa, İbrahim Çelebi b. Yusuf, Mustafa b. Süleyman, Mehmed Çelebi b. Şa‘ban, Mehmed Çelebi b. Ahmed, Ali b. Veli.