Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 126 Hüküm no: 82 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman Efendi’nın kocasından kalan ev ve arsadaki hissesini dâmâdı Mustafa Ağa’ya sattığı Husûs-ı âti’z-zikrin mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi sâbıkā kilâr kethüdâsı iken bundan akdem vefât eden Mehmed Ağa b. Hüseyin’in mahmiye-i İstanbul’da Kumkapı kurbünde Nişancıpaşa Mahallesi’nde vâki‘ arsasının ma‘lûmü’l-mikdârı Mihrî Hatun Vakfı’na senede beş yüz kırk akçe mukāta‘a ile hayâtında tasarrufundan mâ‘adâ arsa ve ebniyesi yedinde mülk ve hakkı olup bir tarafdan Dayızâde el-Hâc Mustafa menzili ve bir tarafdan ba‘zan el-Hâc Ömer ve ba‘zan İsmail Bey mülkleri ve bir tarafdan Şeyhzâde el-Hâc Ahmed veresesi menzilleri ve bir tarafdan tarîk-i âm ile mahdûd ve hâriciyye ve dâhiliyesinde fevkānî ve tahtânî büyût-ı adîde ve hamam ve mahzen ve bi’r-i mâ ve eşcâr-ı müsmire ve gayr-ı müsmireli bahçe ve ahır ve beş bâb dükkânları menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-i mezbûrun verâseti zevce-i metrûkesi Âişe bt. Osman Efendi nâm hatun ile sulbiye kebîre kızları Fâtıma ve Zeyneb nâm hatunlara ve li-ebeveyn er karındaşı Ali Ağa’ya münhasıra ve tashîh-i mes’eleleri yirmi dört sehmden olup sihâm-ı mezbûreden üç sehmi zevcesi mezbûre Âişe Hatun’a ve sekiz sehmi mezbûretân Fâtıma ve Zeyneb hatunlara ve bâkī beş sehmi karındaşı mezbûr Ali Ağa’ya isâbeti tahakkukundan sonra zâtı mahalle-i mezbûre imâmı Mehmed Efendi b. el-Hâc Osman ve müezzin Mehmed Çelebi b. Ahmed ta‘rîfleriyle mu‘arrefe olan mezbûre Âişe Hatun meclis-i ma‘kūd-ı mezkûrda menzil-i mezkûrdan mezbûre Fâtıma’nın mârru’z-zikr ( ) sehm hissesine şirâen mâlik olup kendi nefsinden asıl ve zevcesi mezbûre Zeyneb Hatun tarafından husûs-ı âti’l-beyâna vekîl olduğu mu‘arrifân-ı mezbûrân şehâdetleriyle sâbit ve sübût-ı vekâletine hükm-i şer‘î lâhık olan bâ‘isü hâze’l-kitâb Mustafa Ağa b. Ali mahzarında ikrâr ve takrîr-i kelâm edip menzil-i mezkûr arsa ve ebniye-i memlûkesinden üç sehmi irsen ve mezbûr Ali Ağa’dan semen-i <> ma‘lûm ve medfû‘ ve makbûza iştirâ ve temellük eylediğim mârru’z-zikr beş sehmi şirâen yedimde mülk ve hakkım ve arsa-yı mezkûreden ma‘lûmü’l-mikdârı tasarrufumda olmağın zikr olunan arsa ve ebniye-i memlûkeden cem‘an sekiz sehm hisse-i şer‘iyyemi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile dâmâdım mezbûr Mustafa Ağa’ya bin yüz elli guruşa bey‘ ve temlîk ve arsa-yı mezkûreyi bâ-ma‘rifet-i mütevellî meccânen ferağ ve tefvîz eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semeni olan meblağ-ı mezbûr bin yüz elli guruş ile mezbûr Mustafa Ağa işbu hâzır bi’l-meclis [16b] Bezzâzistânî Mustafa Ağa üzerine üçümüz bir meclis olduğumuz hâlde havâle-i sahîha ile havâle eylediğinde her birimiz havâle-i mezbûreyi ba‘de’l-kabûl hisse-i mezkûreye ve müteveffâ-i mezbûrun sâir kalîl ü kesîr terekesine ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mütâlebât ve eymân ve muhâsamâtdan ben ve dâmâdım mezbûr Mustafa Ağa ile kızım müvekkile-i mezbûreyi ibrâ-i âmm-ı kātı‘u’n-nizâ‘la ibrâ ve iskât eylediğimde onlar dahi ber-vech-i muharrer târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mütâlebât ve muhâsamâtdan beni ibrâ ve iskāt eylediklerini min-ba‘d menzil-i mezkûre ve sâire müte‘allika birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Çukadâr İbrahim Beşe b. Mustafa ve Mahzar Ya‘kub b. Abdullah ve Abdünnebi b. Nuh nâm kimesneler ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ min-şehri Rebî‘ülevvel sene [1]143. Şuhûdü’l-hâl: Umdetü erbâbi’t-tahrîr ve’l-kalem Abdullah Efendi b. Muharrem, İbrahim Efendi b. Ali Efendi, el-Hâc İsmail Odabaşı b. el-Hâc Abdurrahman, Feyzullah Ağa b. Hasan, İbrahim Efendi b. Mahmud, Hüseyin Odabaşı b. Abdullah, es-Seyyid Ahmed Çelebi b. Mehmed, Yusuf Efendi b. Abdullah, İsmail Çelebi b. Yusuf.