Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 129 Hüküm no: 84 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babaları ölen Havva ve Rukiye’ye anneleri Emine bt. Hasan’ın vasi tayin edilmesi Nasb-ı vasî. Mahmiye-i İstanbul’da Tevkī‘î Ca‘fer Mahallesi’nde sâkin iken bundan akdem vefât eden el-Hâc Mehmed b. Halil’in sulbiye sagīre kızları Havvâ ve Rukiye’nin tesviye-i umûrlarına ve babaları müteveffâ-i mezbûrdan müntakil mâllarını hıfz ve zabta kıbel-i şer‘den bir vasî nasb ve ta‘yîn olunmak lâzım ve mühim olmağın sagīretân-ı mezbûretânın vâlideleri olup emânet ile ma‘rûfe ve istikāmet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn haberleriyle lede’ş-şer‘-i şerîf nümâyân olan işbu râfi‘atü’l-vesîka Emine bt. Hasan nâm hatun hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri sagīretân-ı mezbûretânın ahvâlini zabt ve emvâlini hıfza mezbûr Emine Hatun’u vasî nasb ve ta‘yîn eylediğinde ol dahi vesâyet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 14 Rebî‘ülevvel sene [1]143. Şuhûdü’l-hâl: Hüseyin Beşe b. Ahmed, Mehmed Efendi b. Osman, Mehmed Efendi b. Halil, İbrahim b. Abdullah, Ömer Efendi b. Mehmed, el-Hâc Mehmed b. Osman.