Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 129 Hüküm no: 85 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrullah Ağa b. Mustafa’nın boşandığı eşi Fâtıma bt. Veli Ağa’nın çocuklarına nafaka bağlanması Nafaka. Mahmiye-i İstanbul’da Seydîbey Mahallesi sâkinelerinden bâ‘isetü hâzihi’l-vesîka Fâtıma bt. Veli Ağa nâm hatun meclis-i şer‘-i şerîf-i enverde zevc-i mutallıkı Hayrullah Ağa b. Mustafa mahzarında takrîr-i kelâm ve bast-ı merâm edip târih-i kitâbdan bir gün mukaddem zevcim mezbûr beni bâyinen tatlîk etmeğin firâşından hâsıl ve benden mütevellid evlâd-ı sıgārım işbu hâzirûn bi’l-meclis Emrullah ve Mustafa ve Nefîse’nin mâlları olmamağla sıgār-ı merkūmûnun nafaka ve kisveye ve sâir levâzım-ı zarûriyyeleri’çün babaları mezbûr Hayrullah Ağa üzerine kıbel-i şer‘den kadr-i kifâye akçe farz ve takdîr olunması matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri sıgār-ı merkūmûn her birinin nafaka ve kisve ve sâir levâzım-ı zarûriyyeleri’çün babaları mezbûr Hayrullah Ağa üzerine târih-i kitâbdan bi’t-terâzî yevmî dokuzar akçe farz ve takdîr buyurup meblağ-ı mefrûz-ı mezbûru sıgār-ı merkūmûnun nafaka ve kisve ve sâir levâzım-ı zarûriyyeleri’çün harc ve sarfa ve vakt-i zarûretde istidâneye ve lede’z-zafer babaları mezbûr Hayrullah Ağa üzerine rücû‘a mezbûre Fâtıma Hatun’a kıbel-i şer‘den izin-birle mâ-vaka‘a bi’t-taleb ketb olundu. Fî 7 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Ya‘kub b. Abdullah, Abdünnebi b. Nuh, Abdullah b. Mustafa.