Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 130 Hüküm no: 86 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Hasan Çelebi’nin Seyyid Mehmed’e olan borcunu vârisi olan oğluna ödemesi emredildiği İsbât-ı rüşd. Medîne-i Halebü’ş-şehbâ mahallâtından Ferâfire Mahallesi’nde sâkin iken bundan akdem fevt olan es-Seyyid Mehmed b. es-Seyyid Mehmed b. Ebûbekir’in sulbî oğlu ve hasren vârisi ve sin ve cüssesinin bülûğa tahammülü olmağla bülûğuna mu‘terif olan mahmiye-i İstanbul’da Çarşamba pazarı kurbünde mütemekkin es-Seyyid Mehmed meclis-i şer‘-i şerîf-i enverde es-Seyyid Hasan Çelebi b. es-Seyyid Mehmed mahzarında üzerine da‘vâ ve takrîr-i kelâm edip mezbûr es-Seyyid Hasan Çelebi zimmetinde babam müteveffâ-i mezbûrun yirmi guruş cihet-i karzdan hakkı olup kable’l-ahz vefât etmeğin hâlâ ben âkıl ve bâliğ ve reşid ve umûrumu tasarrufa kādir olmamla mezbûr es-Seyyid Hasan Çelebi’ye suâl olunup meblağ-ı mezbûr yirmi guruşu bana edâ ve teslîme tenbîh olunmak matlûbumdur dedikde gıbbe’s-suâl mezbûr es-Seyyid Hasan Çelebi cevâbında fi’l-hakīka müdde‘î-i mezbûrun babası müteveffâ-i mezbûra cihet-i karzdan zimmetinde yirmi guruş deyni olduğunu ikrâr lâkin mezbûr es-Seyyid Mehmed’in âkıl ve bâliğ ve reşid olduğu ma‘lûmum değildir deyü inkâr edicek müdde‘î-i mezbûrdan müdde‘âsına musaddaka beyyine taleb olundukda udûl-i Müslimînden es-Seyyid Abdüllatif b. es-Seyyid Mehmed ve el-Hâc Osman b. el-Hâc Mehmed ve es-Seyyid Hasan b. es-Seyyid Hasan ve es-Seyyid Ali b. es-Seyyid Süleyman ve el-Hâc Mehmed b. el-Hâc Mehmed nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka işbu mezbûr es-Seyyid Mehmed âkıl ve bâliğ ve reşid ve umûrunu tasarrufa kādirdir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 10 Rebî‘ülevvel sene [1]143. Şuhûdü’l-hâl: İbrahim Çelebi b. Mustafa, Mehmed Çelebi b. Abdullah, Ya‘kub b. Abdullah, Ahmed b. Hasan, es-Seyyid Abdüllatif b. es-Seyyid Mehmed, el-Hâc Osman b. el-Hâc Mehmed, es-Seyyid Ali Çelebi b. es-Seyyid Süleyman.