Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 131 Hüküm no: 87 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Kemaleddin Efendi’nin Mimar Ayas Mahallesi’ndeki arsasını Sadi Efendi b. Himmet Efendi’ye sattığı Mahmiye-i İstanbul’da Mi‘mâr Ayas Mahallesi ahâlîsinden umdetü’l-müderrisîni’l-kirâm Mehmed Kemaleddin Efendi b. el-müvellâ el-merhûm Sunullah Efendi b. Ali Efendi tarafından bey‘-i âti’z-zikre vekîl olduğu Mehmed Efendi b. Nurullah ve Süleyman Efendi b. Osman nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Halil Ağa b. Abdullah nâm kimesne meclis-i şer‘-i şerîf-i enverde bâ‘isü hâzihi’l-vesîka fahrü’l-kuzât Sadi Efendi b. Himmet Efendi mahzarında ikrâr ve takrîr-i kelâm edip akd-i âti’z-zikrin sudûruna değin müvekkil-i mûmâ-ileyh Mehmed Kemaleddin Efendi’nin silk-i mülkünde münselik olup mahmiye-i mezbûrede Dabbâğ Yunus Mahallesi’nde vâki‘ bir tarafdan Yedekçizâde Mehmed Ağa utekāsına meşrûta menzil arsası ve bir tarafdan Şumunlu’nun menzil arsası ve bir tarafdan mûmâ-ileyh [17b] Sadi Efendi’nin menzil arsası ve bir tarafdan tarîk-i âm ile mahdûd muhterik mülk menzil arsasını tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi-cümleti’t-tevâbi‘ ve’l-levâhık yüz yetmiş guruşa mûmâ-ileyh Sadi Efendi’ye bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yüz yetmiş guruşu mûmâ-ileyh Sadi Efendi yedinden bi’t-tamam ve’l-kemâl ahz u kabz eyledi. Fîmâ ba‘d arsa-yı mahdûd-ı mezkûre mûmâ-ileyh Sadi Efendi’nin mülk-i müşterâsı olup müvekkilim mûmâ-ileyh Kemaleddin Efendi’nin kat‘â alâka ve medhali kalmamışdır. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Rebî‘ülevvel sene [1]143. Şuhûdü’l-hâl: Fahrü’l-müderrisîni’l-kirâm İbrahim Efendi b. Halil, fahrü’l-kuzât Rahmetullah Efendi, fahrü’l-kuzât Mustafa Efendi Gergerî, el-Hâc Mustafa Efendi b. Mehmed, Ali Efendi b. Hasan, Osman Efendi b. Ahmed.