Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 131 Hüküm no: 88 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’ye babası Nikola v. Dimo’dan intikal eden bostan hissesinin satışı için vasisi olan annesine izin verildiği Mahmiye-i İstanbul’da Edirnekapısı kurbünde Hadice Sultan Mahallesi’nde sâkin iken bundan akdem hâlik olan Nikola v. Dimo v. Nikola nâm zimmînin sulbî sagīr oğlu Yorgi’nin anası ve kıbel-i şer‘î şerîfden mansûbe vasîsi olan Zenbile bt. Balka nâm Nasrâniye ba‘de’t-takrîri’ş-şer‘î meclis-i şer‘-i şerîf-i enverde takrîr-i kelâm ve tâ‘bir ani’l-merâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd Çadırcı el-Hâc Muhyiddin Vakfı’ndan olan bostanın dört sehm i‘tibârıyla iki sehmi icâreteyn-i ma‘lûmeteyn ile hâlik-i mezbûrun hayâtında taht-ı tasarrufunda olup ba‘de helâkihî zikr olunan iki sehmin bir sehmi sulbiye kebîre kızı Katerina’ya ve bir sehmi sagīr-i mezbûr Yorgi’ye intikāl-ı âdî ile intikāl edip lâkin mezbûr Katarina ber-vech-i muharrer bir sehm hissesini âhara ferağ murâd etmekle sagīr-i mezbûrun hisse-i merkūmesi ifrâz olunduğu takdîrce hâsılı harcına vefâ etmeyip sagīr-i mezbûrun mâlı dahi olmayıp nafakaya ihtiyâcı olmağla hisse-i mezbûresi kız karındaşı merkūme Katarina’nın hissesi ile ma‘an bedel-i misli ve ma‘rifet-i mütevellî ile âhara ferağ ve bedeli istirbâh ve ribhi ile sagīr-i mezbûr infâk ve iksâ olunmak sagīr-i mezbûr hakkında her vechile enfa‘ ve evlâ olmağla hakī[ka]t-ı hâl vukūfu olan bî-garaz Müslimînden istihbâr ve haberleri tahrîr ve ber-vech-i muharrer kıbel-i şer‘den izin verilmek bi’l-vesâye matlûbumdur dedikde vâki‘ hâl vasiyy-i mezbûrun bâlâda takrîr eylediği vech üzere olduğunu mahalle-i mezbûre imâmı Abdullah Efendi b. Halil ve Müezzin Ebûbekir Efendi b. Abdullah ile Yuvan v. Martin ve Manol v. Dimitri ve İstavro v. Diyo ve Rali v. Dimitri nâm zimmîlerden her biri alâ-tarîkı’ş-şehâde ihbâr etmeğin mûcebince bostan-ı mezbûrda olan sagīr-i mezbûrun bir sehm-i şâyi‘ini bedel-i misli ve ma‘rifet-i mütevellî ile âhara ferağa vasiyy-i mezbûr Zenbile nâm Nasrâniyeye kıbel-i şer‘den izin verilmeğin mâ-vaka‘a bi’t-taleb ketb olundu. Fî 10 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Osman Efendi b. Mehmed, Ebûbekir Efendi b. Ahmed, Ahmed Çelebi b. Mahmud.