Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 132 Hüküm no: 89 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Ferhad Mahallesi’ndeki mütevellîsi olmayan vakıf evlere mahalle imamı Ali Efendi b. Abdullah’ın hasbî mütevellî tayin edildiği Mahmiye-i İstanbul’da Şeyh Ferhan [Ferhad] Mahallesi imâmlarına gallesi meşrûta vakıf menâzilden merhûme Âbide Hatun Vakfı olup mahalle-i mezbûrede vâki‘ bir tarafdan Dülbendci Hüdaverdi nâm zimmî yedinde mülkü olan menzil ve bir tarafdan Çilingir Serkiz zimmî mülkü menzil ve bir tarafdan Çoban Çavuş Vakfı’ndan Dador zimmî tasarrufunda olan vakıf menzil ve bir tarafdan tarîk-i âm ile mahdûd merkūm Dülbendci Hüdaverdi tasarrufunda olan vakıf menzil ve merhûm[e] Kamer Hatun Vakfı olup mahalle-i mezbûrede vâki‘ bir tarafdan yine mezkûr Çoban Çavuş Vakfı olup Dador zimmî tasarrufunda olan vakıf menzil ve bir tarafdan Darbhâneci Bagram zimmî tasarrufunda olan menzil ve iki tarafdan tarîk-i âm ile mahdûd Bakırcı Nataf zimmî tasarrufunda olan menzil ve bevvâb-ı sultânî merhûm Hasan Ağa Vakfı olup yine mahalle-i mezbûrede vâki‘ bir tarafdan Aci Mardiros Sarraf mülkü ve bir tarafdan Sarraf İstefan zimmî mülkü ve bir tarafdan tarîk-i hâs ve bir tarafdan [18a] tarîk-i âm ile mahdûd Neşko? nâm Nasrâniye tasarrufunda olan vakıf menzil ve merhûm Ahmed Çavuş Vakfı olup Kâtib Kasım Mahallesi’nde vâki‘ bir tarafdan yine Kâtib Kasım Vakfı olup İbrahim Ağa tasarrufunda olan menzil ve bir tarafdan Sarı Serpûşcu Abraham tasarrufunda olan vakıf menzil ve bir tarafdan Gabril ve Sahak menzilleri ve bir tarafdan tarîk-i âm ile mahdûd Sâ‘atçi Margos zimmî tasarrufunda olan menzil min-haysu’l-mecmû‘ dört bâb menzilin mütevellîsi olmayıp kıbel-i şer‘den hasbî mütevellî nasb ve ta‘yîn olunmak lâzım ve mühim ve işbu bâ‘isü’l-kitâb Şeyh Ferhad Mahallesi imâmı Ali Efendi b. Abdullah mahal ve müstehık ve tevliyet-i mezbûre uhdesinden gelmeğe kādir idiği zeyl-i kitâbda muharrerü’l-esâmî mahalle-i mezbûre ahâlîsinden cemm-i gafîr sikāt-ı muvahhidîn ihbâr etmeleriyle hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri imâm-ı mezbûr Ali Efendi’yi menâzil-i mezkûre üzerine hasbî mütevellî nasb ve ta‘yîn buyurduklarında ol dahi kabûl ve hizmet-i lâzımesin edâya müte‘ahhid olmağın mâ-vaka‘a bi’t-taleb ketb olundu. Fî 7 Rebî‘ülevvel sene [1]143. Şuhûdü’l-hâl: El-hâc Mehmed b. Mahmud, Süleyman Çelebi b. Abdurrahman, Molla Ya‘kub b. Mehmed, Hancızâde Mustafa Ağa, Kavukçu Ali Çelebi b. Ömer, Yazıcı es-Seyyid Mehmed Çelebi b. Abdullah, Berber Mehmed Çelebi b. Ömer, Miskçi İbrahim Çelebi b. el-Hâc Mehmed, Osman Ağa b. Ahmed, el-Hâc Halil b. Abdullah, el-Hâc Mustafa Bey.