Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 133 Hüküm no: 90 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşanan Kara Mehmed Beşe b. Abdullah ile Ümmügülsüm bt. Mehmed’in nafaka ve diğer konularda anlaştıkları Mahmiye-i İstanbul’da Aksaray sûku kurbünde Vahhab Ağa odalarında sâkine Ümmügülsüm bt. Mehmed nâm hatun zâtı ba‘de’t-ta‘rîfi’ş-şer‘î meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isetü’l-vesîka Kara Mehmed Beşe b. Abdullah mahzarında ikrâr ve takrîr-i kelâm edip mezbûr Mehmed Beşe zevcim olup târih-i kitâb günü beni bâyinen tatlîk etmekle zimmetinde mütekarrir ve ma‘kūdun-aleyh yirmi beş guruş mehr-i müeccelim ile nafaka-i iddet ve meûnet-i süknâm için bi’t-terâzî ta‘yîn olunan beş guruş ve mezbûr Kara Mehmed Beşe’nin firâşından hâsıl ve benden mütevellid evlâdım Ali ve Âişe nâm sagīrlerin mezbûr diyâr-ı âharda iken ber-mûceb-i hüccet nafaka-i mefrûza-i müstedânelerinden bir buçuk senede müctemi‘ altmış yedi buçuk guruş ve âhara bey‘ ve semenlerin bana îsâl ve teslîm etmek için eşyâ-i memlûkemden kendiye def‘ eylediğim mecmû‘u kırk beş guruş kıymetli bir tek altın bilezik ve hatâyî kaplı sincab kürk semenlerinden otuz iki guruşunu bana teslîm edip on üç guruşunu kendi mesârifine sarfla istihlâk etmeğin cem‘an yüz beş buçuk guruşun on guruşunu beynimizde ma‘lûm menzil icâresinden takās ve istîfâ edip doksan beş buçuk guruş hakkım zimmetinde bâkī kalmağla mezbûr Kara Mehmed Beşe’den suâl olunup meblağ-ı bâkī-i mezbûru hâlen ve nafaka-i iddet ve meûnet-i süknâm için bi’t-terâzî ta‘yîn olunan beş guruş dahi iddetim münkaziye oluncaya dek bana edâ ve teslîme tenbîh olunmak matlûbumdur dedikde gıbbe’s-suâl mezbûr Kara Mehmed Beşe cevâbında kaziyye minvâl-ı meşrûh üzere meblağ-ı mezbûr doksan beş buçuk guruş hâlâ zimmetinde edâsı lâzım ve meblağ-ı mezbûr beş guruş ber-vech-i muharrer deyni olduğunu ikrâr u i‘tirâf etmeğin mûcebince ba‘de’t-tenbîh mezbûre Ümmügülsüm meclis-i merkūmede mezbûr Kara Mehmed Beşe muvâcehesinde iâde-i kelâm edip ânifen edâsına tenbîh olunan meblağ-ı mezkûrdan mâ‘adâ sâir beynimizde cereyân eden ahz u i‘tâya müte‘allika âmme-i da‘vâdan her birimiz âharın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 Rebî‘ülevvel sene [1]143. Şuhûdü’l-hâl: İbrahim Çelebi b. Mustafa, Mehmed Çelebi b. Abdullah, diğer Mehmed Çelebi b. Ahmed, es-Seyyid Ali Çelebi b. ( ).