Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 134 Hüküm no: 91 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Kara Mehmed Beşe b. Abdullah’tan boşanan Ümmügülsüm bt. Mehmed’in kızı için nafaka tayin edildiği Nafaka. Mahmiye-i İstanbul’da Aksaray kurbünde Vahab Ağa odalarında sâkine olup zâtı İbrahim b. Mustafa ve Mehmed b. Abdullah ta‘rîfleriyle mu‘arrefe olan işbu bâ‘isetü’l-vesîka Ümmügülsüm bt. Mehmed nâm hatun meclis-i şer‘-i hatîr-i lâzımü’t-tevkīrde zevc-i mutallıkı Kara Mehmed Beşe b. Abdullah nâm kimesne mahzarında takrîr-i kelâm ve bast-ı merâm edip mezbûr Kara Mehmed Beşe’nin firâşından hâsıl ve benden mütevellid bi-hakkı’l-hıdâne hâlâ hacr ve terbiyemde olan kızım Âişe nâm sagīrenin mâlı olmayıp nafaka ve kisveye eşedd-i ihtiyâc ile muhtâce olmağın babası Kara Mehmed Beşe üzerine kıbel-i şer‘den kadr-i ma‘rûf meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyyesi’çün babası mezbûr Kara Mehmed Beşe üzerine bi’t-terâzî târih-i kitâbdan beher yevm sekiz akçe farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisve ve sâir levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer babası mezbûr Kara Mehmed Beşe üzerine rücû‘a mezbûre Ümmügülsüm Hatun’a izin verilmeğin mâ-vaka‘a bi’t-taleb ketb olundu. Fî 13 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Mehmed b. Ahmed, es-Seyyid Ali b. es-Seyyid Hasan, Mustafa b. İbrahim.