Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 135 Hüküm no: 92 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangın sonucu kullanılmaz duruma gelen ev ve dükkanların enkazının keşfi Husûs-ı âti’z-zikrin mahallinde ketb ve keşif ve takvîm ve tahrîr için sâdır olan fermân-ı âlîye imtisâlen savb-ı şer‘î enverden ba‘s ve irsâl olunan keşif nâibimiz umdetü’l-müderrisîni’l-kirâm Mevlânâ Abdurrahman Efendi b. el-merhûm Mustafa Efendi hâssa mi‘mârlarından Yusuf Halîfe b. Mustafa ile Mahmiye-i İstanbul’da Balatkapısı dâhilinde merhûm el-Hâc İsa Mahallesi’nde vâki‘ Âişe Hatun nâm sâhibü’l-hayrın vakf ve süknâsını merhûm-ı mezbûrun câmi‘-i şerîfinde imâm olanlara şart eylediği muhterik menzil arsası ile yine vâkıfe-i merkūmenin câmi‘-i mezkûrda imâm olanlara gallesini şart eylediği beher mâh otuzar akçe icâre-i müecceleli berber dükkânı ve beher mâh on beş akçe icâre-i müecceleli muhterik attâr dükkânı arsaları üzerlerine varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf ettikde câmi‘-i mezkûrda imâm olan[lara] meşrûtla bâ‘isü hâze’l-kitâb el-Hâc Hasan Efendi b. Abdurrahman meclis-i ma‘kūd-ı mezkûrda vakf-ı mezbûrun hasbî mütevellîsi olan umdetü’l-meşâyih ve’s-sâlikīn Mevlânâ Ahmed Efendi b. Ramazan mahzarında takrîr-i kelâm ve tâ‘bir ani’l-merâm edip arsa-yı merkūme üzerinde olan ebniye-i mevkūfe bin yüz kırk bir senesi mâh-ı Zilhiccesi selhinde vâki‘ olan harîk-ı kebîrde bi-emri’llâhi te‘âlâ muhterik olup vakıfdan binâya müsâ‘ade olmamağla hâlâ içinde mevcûd olan enkāz keşfolunup menzil-i merkūmun arsası üzerine ve kable’l-harîk olan vaz‘-ı kadîmî üzere dükkânân-ı merkūmânın dahi hevâları üzerine her ne binâ eder isem nefsim için mülk olmak üzere binâya izin taleb eylediğimde mütevellî-i mûmâ-ileyh dahi tevliyeti hasebiyle ber-vech-i muharrer izin ve yedime temessük vermeğin arsa-yı merkūme mesâha ve içinde mevcûd olan enkāzı keşif ve takvîm olunmak matlûbumdur dedikde gıbbe’t-tasdîk mi‘mâr-ı mezbûr kıymet-i enkāza vukūf-ı tammı olup zeyl-i vesîkada muharrerü’l-esâmî Müslimûn-ı hâzirûn ile arsa-yı merkūmeye ve enkāz-ı mevcûdeye nazar ve bennâ zirâ‘ı ile mesâha ve takvîm ve tahmîn eylediklerinde arsa-yı menzil terbî‘an yüz elli yedi buçuk zirâ‘ ve dükkânân-ı merkūmânın arsaları terbî‘an otuz beş zirâ‘ olduğu mi‘mâr-ı mezbûr haber ve arsa-yı merkūme içinde mevcûd olan enkāz-ı mevkūfenin kıymeti için iki bin akçe olduğunu mi‘mâr-ı mezkûr Müslimûn-ı hâzirûn ile bi’l-ittifâk haber verdiklerin mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr Hüseyin b. Abdullah ve Muhzır Mustafa b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 11 Rebî‘ülevvel sene [1]143. Şuhûdü’l-hâl: El-hâc Mehmed Efendi b. el-Hâc Ali, Abdurrahman Efendi b. el-Hâc Ali, İsmail Ağa b. Halil, Mehmed Çelebi b. İlyas, Ahmed Çelebi b. Hasan, Mehmed Beşe b. Mustafa, es-Seyyid Mehmed b. Osman, Mehmed Ali b. Süleyman, İbrahim Çelebi b. Abdurrahman, Abdulkādir b. Şa‘ban, Müezzin Abdi Çelebi b. Muslu Abdullah Ağa b. Muslu, Abdi Çelebi b. Mehmed, Mustafa Çelebi b. Habib, Osman b. Hüseyin.