Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 136 Hüküm no: 93 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangın sonucu kullanılmaz hale gelen Çadırcı Ahmed Mahallesi’nde Aya Kiryaki kilisenin aslına uygun olarak yeniden yapıldığı Hilâl-i sutûr[da] mastû[r] husûsun keşif ve tahrîri’çün sâdır olan fermân-ı âlîye imtisâlen bu fakīr husûs-ı mezbûra mübâşir ta‘yîn olunan Mehmed Efendi ve Çukadâr Hasan Ağa ve ser-mi‘mârân-ı hâssa Mehmed Ağa ve hulefâlarından Hacı Mehmed Halîfe ve diğer Mehmed Halîfe ve el-Hâc Mustafa Halîfe ve kâtibi Salih Efendi ile Mahmiye-i İstanbul’da Kadırga limanı kurbünde Çadırcı Ahmed Mahallesi’nde vâki‘ harîkde muhterik ve bi’l-külliye münhedim olmağın fetvâ-yı şerîfe ve bâ-fermân-ı âlî binâsına ruhsat verilip târih-i kitâbda binâsı tamam ve Aya Kiryaki kenîsesi demekle ma‘rûf Rum tâifesine mahsûs olan kenîse-i mezbûrenin üzerine varılıp ahâlî-i mahalle-i mezbûre ve civârında vâki‘ mahalle ahâlîlerinden zeyl-i vesîkada muharrerü’l-esâmî cemâ‘at-i Müslimîn mahzarlarında akd-i meclis-i şer‘-i hatîr olundukda kenîse-i merkūmenin mütevellîleri Astori v. Dimitri ve Kostantin v. Arslan ve kethüdâsı Lefte v. Yuvan nâm zimmîler meclis-i ma‘kūd-ı mezkûrda her biri takrîr-i kelâm ve tâ‘bir ani’l-merâm edip feth-i hâkānîden berü yedlerimizde terk olunup dâhilinde âyinimiz icrâsı’çün kadîmî ma‘bedimiz olan işbu kenîse-i kadîme-i mezkûremiz bundan akdem vâki‘ olan harîkde bi’l-külliye muhterik ve münhedim olmağla yedlerimizde olan fetvâ-yı şerîfe ve fermân-ı âlî mantûkunca binâsına ruhsat verilip hâlâ binâsı tamam olmağla tekrar keşif ve mesâha olunup yedlerimizde olan keşif hüccetine mutâbık oldukda yedlerimize sûret-i sicil i‘tâ olunmak matlûbumuzdur dediklerinde mi‘mârûn-ı mezbûrûn kenîse-i merkūme ve etrâf ve cevânibini alâ-vechi’t-tedkīk keşif ve tahkīk edip tûlen ve arzen hudûd-ı kadîmesi ve kadden irtifâ‘ı mesâha olundukda keşf-i evvel hücceti mantûkunca vaz‘-ı kadîmî olan otuz zirâ‘ asıl tûlünden bir zirâ‘ yedi parmak noksan ve on dokuz zirâ‘ asıl arzından nısf zirâ‘ noksan ve etrâf duvarlarının yedi buçuk zirâ‘ asıl tûlünden bir zirâ‘ noksan ve İncilhâne önünde on dokuz buçuk zirâ‘ tahta perdenin asıl tûlünden ve kenîse-i merkūmenin kapısı üzerine on dokuz buçuk zirâ‘ sundurma sakfın asıl tûlünden on sekiz parmak ve arzından altı parmak noksan olup ve kenîse-i mezbûrenin derûn-ı bîrûnunda olan dökme sütûn ve kemerleri ağaç duvarları horasan ve kireç ile melez tâ‘bir olunur ve döşemesi etrâf-ı erba‘asına olan yirmi aded pencere ve demir kapakları ve derûn-ı kenîseye duhûl edecek ricâle mahsûs kapının biri mermer ve biri taş çârçûbe ve demir kanadları ve nisâya mahsûs bir kapının taş çârçûbe [19a] ve demir kanadlı ve yine nisâya mahsûs derûn-ı kenîsede kafesli sofa ve kenîse-i mezbûrenin sâir müştemilâtı bi’l-cümle keşf-i evvele mûtabıkdır deyü mi‘mârûn-ı mezbûrûn haber verdiklerine işbu müşâhede olunan kenîsenin binâsı vaz‘-ı kadîme üzere min-gayrı tevsî‘ ve-lâ terfî‘ binâ olunduğunu mahalle-i mezbûre ve civârında vâki‘ mahalle ahâlîleri zeyl-i vesîkada muharrerü’l-esâmî Müslimûn-ı hâzirûndan her biri makām-ı şahâdetde haber vermeleriyle mâ-hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min-şehri Rebî‘i’l-evvel li-sene selâse ve erba‘în ve mi’e ve elf. Şuhûdü’l-hâl: Veliyüddin Efendi el-imâm, Müezzin Ya‘kub Efendi, Abdullah Efendi b. Hasan, Hasan Ağa b. İbrahim, Hacı Ahmed b. Mustafa, İbrahim b. Ali, Osman Beşe b. Hacı Mehmed, Molla Ali b. Ahmed, Hasan b. Abdullah, Musa Çelebi b. Abdullah, Mahmud Ağa b. Mehmed, es-Seyyid Mehmed Efendi b. Ali el-imâm, Ahmed Halîfe b. Hüseyin el-müezzin, Ali Bey b. Hacı Mahmud, Molla Hasan b. İbrahim, Mehmed Beşe b. İbrahim, es-Seyyid Hacı İbrahim b. Mustafa, Mehmed Beşe b. Yusuf, Ali b. Mehmed, Abdullah Halîfe b. Mehmed, Hasan Ağa b. Mehmed, Hacı Osman b. Ali, Mehmed Ağa b. Hasan, Hacı Taha b. Abdullah, Mehmed b. Mustafa, Mehmed b. Hasan, Mehmed b. Mustafa, Mustafa Beşe b. Receb, Seyyid Abdurrahman b. es-Seyyid Ömer, Mustafa b. Abdullah, Hacı Süleyman b. Ahmed, Molla Mustafa b. Abdullah, es-Seyyid Hasan b. İbrahim.