Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 137 Hüküm no: 94 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızları Havva ve Rukiye’nin vasisi olan Emine Hatun’a çocukların ihtiyaçları için babalarından kalan maldan harcama yapmasına izin verildiği Nafaka. Mahmiye-i İstanbul’da Tevkī‘î Ca‘fer Mahallesi’nde sâkin iken bundan akdem vefât eden el-Hâc Mehmed b. Halil b. Abdullah’ın sulbiye sagīre kızları Havvâ ve Rukiye’nin tesviye-i umûrlarına kıbel-i şer‘den mansûbe vasîleri ve vâlideleri işbu râfi‘atü’l-vesîka Emine bt. Hasan nâm hatun meclis-i şer‘-i hatîr-i lâzımü’t-tevkīrde takrîr-i kelâm ve tâ‘bir ani’l-merâm edip vasîleri olduğum sagīretân-ı mezbûretânın nafaka ve kisveye eşedd-i ihtiyâcları olmağla babaları müteveffâ-i mezbûr el-Hâc Mehmed’den müntakil mâllarından kadr-i ma‘rûf meblağ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık ve meblağ-ı âti’z-zikr sagīretân-ı mezbûretânın mâllarına nisbetle kadr-i ma‘rûf olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’ş-şerîf zâhir ve mütebeyyin olmağla hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīretân-ı mezbûretânın mâl-ı müntakillerinden târih-i kitâbdan yevmî her birine üçer paradan cem‘an altı para nafaka ve kisve-bahâ farz ve takdîr edip meblağ-ı mefrûz-ı mezbûrun sagīretân-ı mezbûretânın nafaka ve kisve ve sâir levâzım-ı zarûriyyelerine harc ve sarfa inde’z-zarûre istidâneye ve lede’z-zafer mâl-ı müntakillerine rücû‘a vâlideleri vasiyye-i mezbûre Emine Hatun’a izin verilmeğin mâ-vaka‘a bi’t-taleb ketb olundu. Fî 14 şehr-i Rebî‘ülevvel sene [1]143. Şuhûdü’l-hâl: Mehmed Efendi b. Osman, Ömer Efendi b. Mehmed, Mehmed b. Halil, el-Hâc Mehmed b. Osman, Hüseyin Beşe b. Ahmed, İbrahim b. Abdullah. Beyâz, beyâz, beyâz Temmü’l-kelâm mâ-vaka‘a fîhi [Sayfanın altı tarafındaki boşlu beyâz ifâdesiyle çizilmiştir.] [Mühür] Abdihi İbrahim (…) bi’llâhi’l-azîm [19b] Vak‘ada kādı olan fazîletli semâhatlü İbrahim Efendi gününde vâki‘ hücec ve i‘lâmdır. Beyâz, beyâz, beyâz