Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 138 Hüküm no: 95 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hammamî Sâliha Hatun bt. Ahmed’in vasiyeti Nasb-ı vasî-i muhtâr. Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ es-Seyyid Feyzullah Efendi b. el-merhûm Abdülkerim Efendi mahmiye-i İstanbul’da Yenibahçe kurbünde Lütfipaşa Mahallesi’nde Hammâmî Sâliha Hatun bt. Ahmed b. Veli’nin sâkine olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ekdikde zâtı Veli Dede b. Ahmed ve es-Seyyid Hüseyin b. Ahmed ta‘rîfleriyle mu‘arrefe olan mezbûre Sâliha Hatun meclis-i ma‘kūd-ı mezkûrda zevci bâ‘isü hâze’l-kitâb Süleyman Beşe b. Ali mahzarında ikrâr-ı tâm ve takrîr-i kelâm edip ben bi-emri’llâhi te‘âlâ vefât eylediğimde cemî‘ terekem ba‘de’l-kabz tereke-i mezkûremden zevcim mezbûr Süleyman Beşe’ye cihet-i karz-ı şer‘îden zimmetimde deynim olan iki yüze elli guruş ve Üçüncü Mehmed Ağa nâm kimesneye deynim olan üç guruş ve Peştamalcı Kirkor nâm zimmîye beş guruş ve Yorgancı Mustafa Çelebi nâm kimesneye on dört buçuk guruş ve Oduncu Mustafa nâm kimesneye on iki guruş ve Külhâncı Mustafa’ya bir guruş ve Saka Mehmed’e bir buçuk guruş ve Horasancı Serkiz’e iki guruş ve Hanife Hatun’a yedi guruş deynim edâ ve teslîm olundukdan sonra bâkī kalan terekemin sülüsü ifrâz ve sülüs-i mezbûrdan bin bir akçe ıskāt-ı salâtım için vech-i mesnûn üzere fukarâya tevzî‘ oluna ve yine sülüs-i mezbûrdan on beş guruş ile bir Mushaf-ı şerîf ve bir Birgili Mehmed Efendi Risâlesi iştirâ olunup her biri birer müstehak kimesneye verile ve yine sülüs-i mezbûrdan on beş guruş ile eyyâm-ı mu‘tâdede tabh-ı ta‘âm ve it‘âm-ı fukarâ oluna ve sülüs-i mezbûrdan nesne bâkī kalırsa kendi dilediği vücûh-ı birre harc ve sarf eyleye ve mâ‘adâ sülüsân-ı terekem veresem beyninde alâ-mâ-farazallâhu te‘âlâ tevzî‘ ve taksîm oluna deyü vasiyyet ve tenfîzine zevcim mezbûr Süleyman Beşe’yi vasiyy-i muhtâr nasb ve ta‘yîn eylediğimde ol dahi vesâyet-i mezbûreyi kabûl ve merâsimine kemâ-yenbagī edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Mehmed b. Abdullah ve Muhzır Hüseyin b. Ali ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 24 Rebî‘ülevvel sene [1]143. Şuhûdü’l-hâl: Veli Dede b. Mehmed, es-Seyyid Hüseyin b. Mehmed, Mehmed Ağa b. Süleyman, Ahmed b. Osman, Kayyum Süleyman Çelebi b. Ahmed, Müezzin el-Hâc Ahmed b. Hasan, Müezzin Derviş Mehmed b. İsmail.