Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 139 Hüküm no: 96 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ereğli Mahallesi’ndeki evde oturan Ali’nin durumunun vakfın şartlarına uymadığı Tevcîh-i menzil. Yu‘melü bimâ-fîhi harrerehü’l-fakīr ileyhi sübhânehû Şeyh Mehmed ufiye anh. Tevcîhün vecihün sadara min-ehlihi ilâ-mahallihî zeberehü’l-fakīru ileyh azze şânühu es-Seyyid Abdullah el-kādı bi-asker-i Rumeli ufiye anhü. Sadara’t-tevcîh ani’l-abdi’l-fakīr ilâ-birr-i Rabbihi’l-kadîr azze şânühu İbrahim el-kādı bi-medîneti Kostantıniyye el-mahmiyye gufira leh. Savâhib-i hayrâtdan Kahraman nâm sâhibetü’l-hayrın süknâsı ulemâ ve sulehâdan süknâya muhtâc olan bir recül-i sâlihe meşrûta vakfı olup mahmiye-i İstanbul’da Şehremini kurbünde Ereğli Mahallesi’nde vâki‘ bir tarafdan Şîrugânzâde Ali Efendi Tekyesi ve iki tarafdan Mehmed Efendi nâm kimesne menzili ve bir tarafdan tarîk-i âm ile mahdûd ma‘lûmü’l-müştemilât vakıf menzile tevcîh-i hükmü’ş-şer‘le mutasarrıf olan Ali nâm şâbb-ı emred ulemâ ve sulehâdan olmadığından gayrı süknâya dahi ihtiyâcı olmadığı ahâlî-i mahalle-i mezbûreden İmâm Mustafa Efendi b. Ahmed ve İbrahim Çelebi b. Halil ve Mehmed Çelebi b. Mahmud ve el-Hâc Mustafa b. Muslu nâm kimesneler ihbârlarıyla müte‘ayyin olmağın mûcebince ba‘de’r-ref‘ hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri süknâ-yı menzil-i mezbûru ulemâ ve sulehâdan süknâya muhtâc olan bâ‘isetü’l-vesîka es-Seyyid İbrahim Efendi b. Abdülgaffar nâm kimesneye kıbel-i şer‘den tevcîh eylemeleriyle mâ-hüve’l-vâki‘ bi’t-taleb ketb olundu. Fî 24 Rebî‘ülevvel sene [1]143. Şuhûdü’l-hâl: Mahalle-i mezbûre imâmı Mustafa Efendi b. Ahmed, Müezzin Mustafa Halîfe b. Ali, Ahmed Ağa b. Mehmed, Halil Ağa b. Osman, el-Hâc Ahmed Ağa b. Mehmed, Mehmed Çelebi b. İbrahim, Mehmed Çelebi b. Abdullah, Mehmed Ağa b. Mehmed, Mahmud Çelebi b. Mustafa, Mehmed Efendi b. Nurullah.