Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 140 Hüküm no: 97 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âşıkpaşa Mahallesi’ndeki evde oturan İsmail’in durumunun vakfın şartlarına uymadığı Tevcîh, bâ-imzâ-i hazret-i efendi. Ashâb-ı hayrâtdan merhûm el-Hâc İlyas nâm sâhibü’l-hayrın Mahmiye-i İstanbul’da Âşıkpaşa Mahallesi’nde süknâ ve tevliyeti kendiye ba‘dehû evlâdına ve evlâd-ı evlâdına ba‘de’l-inkırâz utekāsına ba‘dehum evlâdına ve evlâd-ı evlâdına ba‘de’l-inkırâzi’l-küll re’y-i hâkimü’ş-şer‘le fukarâ ve sulehâdan süknâya muhtâc bir recül-i sâlihe meşrûta vakfı olduğu hücec-i müte‘addide mantûkunca müte‘ayyin olup mahalle-i mezbûrede vâki‘ bir tarafdan Kitâbçı el-Hâc Mahmud mülkü ve bir tarafdan Mukābeleci el-Hâc Hüseyin Ağa mülkü ve bir tarafdan Attâr Hamza mülkü ve bir tarafdan tarîk-i hâs ile mahdûd hâriciyye ve dâhiliyede büyût-ı adîdeyi müştemil vakıf menzile tevcîh-i hâkimü’ş-şer‘le mutasarrıf olan Mehmed Efendi b. Süleyman nâm kimesne bundan akdem tarîk-i hacc-ı şerîfde vefât edip müteveffâ-i mezbûrun menzil-i mezbûra bâ-hüccet-i şer‘iyye altmış bin dokuz yüz otuz yedi akçe masrûfu olduğu müte‘ayyin iken menzil-i mezbûru bundan akdem süknâya muhtâc olan süknâya muhtâc olmayan mütemevvilînden İsmail nâm kimesne bir tarîk ile hilâf-ı şart-ı vâkıf kendiye tevcîh ettirdiği ihbâr-ı sikāt ile lede’ş-şer‘i’l-enver zâhir ve müte‘ayyin ve müteveffâ-i mezbûrun li-ebeveyn er karındaşı oğlu ve hasren vârisi olan Abdulkādir b. Mustafa nâm kimesne ulemâ ve sulehâ ve fukarâdan olup süknâya eşedd-i ihtiyâc ile muhtâc olmağın hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri süknâ-yı menzil-i mezbûru ber-mûceb-i şart-ı vâkıf mezbûr İsmail ref‘inden merkūm Abdulkādir Çelebi’ye tevcîh ve tasarrufuna kıbel-i şer‘den izin-birle mâ-hüve’l-vâki‘ bi’t-taleb ketb olundu. Fî 27 Rebî‘ülevvel sene [1]143. Şuhûdü’l-hâl: Umdetü’l-mevâliyyi’l-izâm Nev‘îzâde fazîletli Mehmed Salih Efendi, Atâullah Efendi b. Hasan Efendi, Abdurrahman Ağa b. Mustafa, Mehmed Ağa b. Mehmed, Mehmed Çelebi b. Abdullah, Mahmud Çelebi b. Ahmed.