Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 140 Hüküm no: 98 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun tüccarları ile Kasaplar Kethüdası Hattat Mehmed Ağa’nın anlaştığı Husûs-ı âti’l-beyânın mahallinde ketb ü tahrîri için savb-ı şer‘-i kavîmden irsâl olunan başkâtibimiz Mevlânâ Mustafa Efendi b. Yunus Efendi Mahmiye-i İstanbul hısnı ebvâbından Yedikule hâricinde vâki‘ selhhânelerden kasablar kethüdâsı Hattât Mehmed Ağa b. Yusuf’un tasarrufunda olan selhhâneye varıp zeyl-i sahîfede mektûbü’l-esâmî Müslimîn huzûrlarında akd-i meclis-i şer‘-i şerîf ettikde Mahmiye-i mezbûreye ağnâm götüren celeb tâifesinden dört bin ağnâm sâhibi el-Hâc Ali b. Selim ve sayıcısı Yamandi ve altı bin ganem sâhibi Deli Hasan ve şerîki Derviş ve bin beş yüz ganem sâhibi Kasabbaşızâde Hüseyin Ağa vekîl-i şer‘îsi mezbûr el-Hâc Ali ve bin ganem sâhibi Mehmed Beşe b. Ali ve yedi bin beş yüz ganem sâhibi Viraca (İvraca) ahâlîsinden Mustafa Bey ve şerîkleri Meto ve Semercioğlu Dobço ve üç bin ganem sâhibi Beybolulu [Niğbolulu] Halil Ağa b. Mehmed ile tâife-i mezbûreden bin beş yüz ganem sâhibi İstanko v. Kirko ve iki bin üç yüz ganem sâhibi Kolo v. Mano ve iki bin sekiz yüz ganem sâhibi Çavdar v. Kolo ve iki bin dört yüz ganem sâhibi Rayko v. Todori ve iki bin beş yüz ganem sâhibi Petro v. Çavdar ve bin beş yüz ganem sâhibi İstoyan v. Yuvan ve bin ganem sâhibi Hamo v. Lazar ve bin ganem sâhibi Köse İstoyan ve bin ganem sâhibi Kiro v. İstamo ve bin altı yüz ganem sâhibi Dobro v. Totori ve dört bin beş yüz ganem sâhibi Nikola ve şerîki karındaşı Dragan v. Kolo ve bin yüz ganem sâhibi İstoyo v. Kostantin ve iki bin beş yüz ganem sâhibi Tolca v. Yuvan[‘ın] vekîl-i şer‘îsi Penaki v. Todori ve bin beş yüz ganem sâhibi Kara Yovanoğlu Meto ve sekiz yüz ganem sâhibi Rayko v. Kolo ve bin iki yüz ganem sâhibi Kuşcaoğlu ve bin altı yüz ganem sâhibi Konca karındaşı Dimitri nâm zimmîler meclis-i ma‘kūd-ı mezkûrda işbu ashâbü’l-kitâb kasab tâifesinden Kethüdâ Mehmed Ağa b. Yusuf ve el-Hâc Osman Ağa b. Abdullah ve Salih Ağa b. Mahmud ve Yiğitbaşı Ahmed Çelebi b. Mustafa ile sâir ma‘lûmü’l-esâmî ve’l-eşhâs kasab tâifesi taraflarından vekîl-i şer‘îleri olan kethüdâ-yı mezbûr Hattât Mehmed Ağa mahzarında her biri takrîr-i kelâm ve tâ‘bir ani’l-merâm edip zikr olunan ağnâmımızı zebh ve lühûmunu narh-ı cârî üzere ibâdullâha bey‘ için mezbûrûn kasab tâifesine def‘ ve teslîm onlar dahi yedimizden ba‘de’l-kabz zebh ve semenlerini bize cem‘ ve tahsîl ve ücret-i kasabiye ve ücret-i dükkân ve ücret-i devâb ve sâir mesârifleri’çün bi’t-terâzî her bir re’s ganem için altmış akçe ücret olmak üzere mezbûrûnu istîcâr eylediğimizde onlar dahi râzı ve ber-vech-i muharrer nefislerini bize îcâr eylediler dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr İbrahim b. Ali ve Muhzır Abdünnebi b. Nuh ile meclis-i şer‘a gelip her biri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 2 Rebî‘ülâhir sene [1]143. Şuhûdü’l-hâl: El-hâc Ali b. Selim, el-Hâc İbrahim b. Süleyman, Ebûbekir Çelebi b. Bektaş, el-Hâc Ahmed b. Yusuf, el-Hâc Ahmed b. Halil, Mehmed Çelebi b. İbrahim, Osman Efendi b. Mehmed, İsmail Yazıcı b. el-Hâc Ahmed, el-Hâc Mehmed b. Abdurrahman.