Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 142 Hüküm no: 99 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ömer Ağa b. İsmail ile Mustafa Ağa b. Hasan’ın aralarındaki alacak davasında sulh oldukları Fi’l-asl vilâyet-i Anadolu’da Malatya kazâsı ahâlîsinden olup medîne-i Üsküdar’da Yenihanda müsâfiren sâkin el-Hâc Ömer Ağa b. İsmail nâm kimesne meclis-i şer‘-i şerîf-i enverde işbu bâ‘isü’l-kitâb Mustafa Ağa b. Hasan b. Abdullah nâm kimesne tarafından husûs-ı âti’l-beyânı tasdîka vekîl olduğu el-Hâc Ömer b. Salih ve Mehmed Çelebi b. Hasan nâm kimesneler şehâdetleriyle şer‘an sâbit olan Hâfız Mehmed b. Hasan nâm kimesne mahzarında ikrâr ve takrîr-i kelâm edip müvekkil-i mezbûr Mustafa Ağa zikr olunan Malatya kazâsında mütesellim olup târih-i kitâbdan bir sene mukaddem bir husûs için beni habsedip mâlımdan cebren ve bi-gayr-ı hakkın iki bin guruş ile yüz otuz guruş kıymetli bir tüfenk ve iki yüz guruş kıymetli iki re’s atımı ahz u kabz etmekle meblağ-ı mezbûr ile zikr olunan tüfenk ve atların aynları mevcûd ise a‘yânını değil ise kıymet-i şer‘iyyelerini taleb ve da‘vâ sadedinde olmuşidim el-hâletü hâzihî beynimize muslihûn tavassut edip da‘vâ-yı mezkûremden beni mezbûr Mustafa Ağa ile yüz elli beş guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz altmış beş guruşu vekîl-i mezbûr Hâfız Mehmed yedinden tamamen ahz u kabz edip husûs-ı mezbûra müte‘allika âmme-i da‘vâ ve kâffe-i mütâlebâtdan mezbûr Mustafa Ağa’nın zimmetini ibrâ ve iskāt eylediğimden sonra vekîl-i mezbûr dahi bana bedel-i sulh olmak üzere medfû‘u olan yüz altmış beş guruşa müte‘allika âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 Rebî‘ülâhir sene [1]143. Şuhûdü’l-hâl: Mustafa Ağa b. Ali, İbrahim b. Mehmed, Ahmed b. Mehmed, Ali b. Mehmed, Osman b. Ali, İsmail b. Abdullah, Himmet b. Mehmed, Mehmed b. Hasan.