Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 142 Hüküm no: 100 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmudpaşa Mahallesi’ndeki evde oturan Baltacı Hasan’ın durumunun vakfın şartlarına uymadığı Bâ-imzâ-i hazret-i efendi. Mahmiye-i İstanbul’da Mahmudpaşa Mahallesi’nde merhûm Musa Çelebi nâm sâhibü’l-hayrın süknâsı ulemâya meşrûta vakfı olup bir tarafdan Mübâya‘acı Ahmed Ağa mülkü ve bir tarafdan es-Seyyid İbrahim Efendi menzili ve iki tarafdan tarîk-i âm ile mahdûd ve ma‘lûmü’l-müştemilât menzilin mutasarrıfı Baltacı Hasan’ın adem-i istihkākına arzuhâl ve vâki‘ hâli teftîş edip mûceb-i icrâ ve tevcîh olunmak bâbında işâret-i hazret-i şeyhülislâm ve mûcebince bu fakīre hitâben fermân-ı âlî vârid olup imtisâlen husûs-ı mezbûr teftîş olundukda merkūm Baltacı Hasan’ın ulemâdan olmayıp hâlâ Anadolu mukāta‘a mültezimlerinden ve İstanbul’da mahall-i müte‘addide mülk menâzili olup bir vechile istihkākı yoğiken menâzil-i mezbûre tevcîh-i hâkimü’ş-şer‘le mutasarrıf olan es-Seyyid Mustafa’nın vefâtından sonra tedâvül-i eyâdî ile fırsat bulup ba‘zı mahalde n şefâ‘at ve ibrâm ile üzerine tevcîh ve tevcîh-i mezbûr hilâf-ı şart-ı vâkıf idiği ba‘de’t-teftîş zâhir olmağın menzil-i mevkūf-ı mezbûr ulemâdan olup süknâya ihtiyâcı olan bâ‘isü hâze’l-kitâb İbrahim Efendi b. Abdullah Efendi’ye şart-ı vâkıf üzere bâ-işâret-i şeyhülislâm ve bâ-fermân-ı âlî kıbel-i şer‘den merkūm İbrahim Efendi’ye tevcîh olunmağın işbu vesîka-i enîka li-ecli’s-sebt ketb olundu. Fî-evâili şehri Rebî‘ülâhir sene [1]143. Şuhûdü’l-hâl: Mustafa Efendi İmâmzâde, Mehmed Ağa b. Ahmed Efendi, Mehmed Efendi b. ( ), es-Seyyid Ahmed Efendi b. ( ), Osman Efendi b. ( ), Feyzullah Efendi.