Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 143 Hüküm no: 101 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ali ile el-Hâc Süleyman Efendi’nin aralarındaki alacak davasında sulh oldukları Vilâyet-i Anadolu’da Afyonkarahisar kazâsında hâlâ me’zûn bi’l-iftâ olup Mahmiye-i İstanbul’da müsâfiren sâkin Mehmed Efendi b. Ali meclis-i şer‘-i şerîf-i enverde bâ‘isetü’l-vesîka el-Hâc Süleyman Efendi b. Receb mahzarında ikrâr-ı tâm ve takrîr-i kelâm edip mezbûr el-Hâc Süleyman Efendi târih-i kitâbdan iki sene mukaddem kazâ-i mezbûrda nâibü’ş-şer‘ olmağla arz akçesi nâmıyla mâlımdan elli guruş ahz ve mesârifine sarfla istihlâk etmeğin hâlâ meblağ-ı mezbûru merkūm el-Hâc Süleyman Efendi yedinden da‘vâya tasaddî eylediğimde ol dahi inkâr etmeğin beynimizde nizâ‘-ı küllî cereyân etmişidi el-hâletü hâzihî muslihûn tavassutuyla da‘vâ-yı mezkûremden beni mezbûr el-Hâc Süleyman Efendi ile yirmi beş guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yirmi beş guruşu mezbûr yedinden tamamen ahz u kabz eylediğimden sonra mâ‘adâya müte‘allika da‘vâdan mezbûr el-Hâc Süleyman Efendi’nin zimmetini ibrâ ve iskāt eyledim fîmâ ba‘d birbirimiz ile bi-vechin mine’l-vücûh da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Rebî‘ülâhir sene [1]143. Şuhûdü’l-hâl: Başkâtib Mustafa Efendi b. Yunus Efendi, el-Hâc Mehmed Emin Efendi b. Hasan, Mehmed Efendi b. İbrahim, Mehmed b. Abdülvehhab, es-Seyyid Ahmed Efendi b. Bostanzâde , Mehmed Ağa b. Mehmed kethüdâ-yı muhzırân, Osman Efendi b. Hasan.