Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 144 Hüküm no: 102 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri ocağı imamı Mehmed Efendi’nin kendinden önceki imam Hafız Mehmed Efendi’ye olan borcunu kabul ettiği İkrâr-ı deyn. Hâlâ Dergâh-ı âlî -dâme mahfûfen bi’l-me‘âlî- yeniçerileri ocağı imâmı fahrü’l-huffâz Mehmed Efendi b. Ahmed Efendi meclis-i şer‘-i hatîr-i lâzımü’t-tevkīrde sâbıkā ocak imâmı olan sâhibü hâzihi’l-vesîka diğer Hâfız Mehmed Efendi b. Ahmed mahzarında ikrâr-ı tâm ve takrîr-i kelâm edip mezbûr diğer Hâfız Mehmed Efendi yedinden bundan akdem ber-mûceb-i defter-i müfredât iştirâ ve tesellüm ve kabz ve kabûl eylediğim eşyâ-i mütenevvi‘a semenlerinden sekiz yüz otuz beş guruş ve cihet-i karz-ı şer‘îden beş yüz guruş ki ciheteyn-i mezbûreteynden cem‘an bin üç yüz otuz beş guruş mûmâ-ileyh diğer Hâfız Mehmed Efendi’ye zimmetimde edâsı lâzım deynimdir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 4 Rebî‘ülâhir sene [1]143. Şuhûdü’l-hâl: Ali Efendi b. İbrahim, es-Seyyid Mehmed b. Ahmed, Ahmed Çelebi b. Abdullah, Süleyman Beşe b. Abdullah, Molla Ahmed b. Osman, Molla Mehmed b. Hasan.