Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 144 Hüküm no: 103 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrişim, düğme, gaytan ve ipekçi esnafının talebi doğrultusunda Ali Çelebi b. Mustafa’nın kethüda tayin edilmesi Nasb-ı kethüdâ. Mahmiye-i İstanbul’da Bezzâzistân-ı atîk kurbünde vâki‘ ibrişim ve düğme ve gaytan ve ipekçi tâifesinden el-Hâc Abdullah b. el-Hâc Mehmed ve el-Hâc Hüseyin b. el-Hâc Abdi ve el-Hâc Mehmed b. İsmail ve Mahmud b. İsmail ve Süleyman Çelebi b. İsmail ve Mustafa Çelebi b. Hasan ve İbrahim Çelebi b. İsmail ve İbrahim Çelebi b. el-Hâc Abdullah ve Hasan Çelebi b. Ali ve Yiğitbaşı Mehmed Çelebi b. Ahmed ve Ali Çelebi ve İbrahim Çelebi b. Hasan nâm kimesneler ile tâife-i mezbûreden Kostantin v. Yamandi ve Panayot v. Petro ve Anton v. Oseb ve Atam v. David ve Kalomed v. Avanis ve Anton v. Avanis ve Aydın v. Oytun ve Asvador v. Malkon ve Kestostor v. Mıgırdıç ve Bogos v. Miyas ve Asvador v. Kirkor ve Mayro v. David ve Yasef v. Aslan ve Rafail v. Mihail ve İsak v. Yako ve Baruh v. Yako ve Salto v. Samarya ve Yasef v. Semol ve Paşva? v. Ulram? ve Yako v. İsrail ve İsrail v. İsak ve sâirleri meclis-i şer‘-i hatîr-i lâzımü’t-tevkīrde tâife-i mezbûre ihtiyârlarından işbu bâ‘isü’l-kitâb Ali Çelebi b. Mustafa mahzarında her biri ikrâr ve takrîr-i kelâm edip Şekerpâre demekle şehîr Mehmed nâm mühtedî bundan akdem bâ-berât-ı âlîşân kethüdâmız olup mezbûr mühtedî hırfetimiz erbâbından olmamağla bizi rencîde ve ta‘cîzden hâlî olmayıp ve bâ-fermân-ı âlî ref‘ ve esâmîsi terkīn olunmağın hırfetimiz ihtiyârlarından bâlâda mezkûr Ali Çelebi b. Mustafa nâm kimesne sâlih ve mütedeyyin ve perhizkâr ve min-külli’l-vücûh muhtârımız olmağla üzerimize kethüdâ nasb ve ta‘yîn ve kıbel-i şer‘den yedine hüccet verilmek matlûbumuzdur dediklerinde tâife-i mezbûrenin nizâmlari’çün mezbûr Ali Çelebi bi’l-iltimâs üzerlerine kethüdâ nasb ve ta‘yîn olundukda mezbûr Ali Çelebi dahi zikr olunan kethüdâlığı kabûl ve hizmet-i lâzımesin edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin şehri Rebî‘ülâhir sene 1143. Şuhûdü’l-hâl: Mehmed Çelebi b. Abdullah, İbrahim b. Mustafa, Abdullah b. Mustafa, Mehmed b. Hüseyin, Eyüb Çelebi b. Mehmed, Mustafa b. Ömer.