Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 145 Hüküm no: 104 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömerzâde el-Hâc Ahmed Ağa ile eşi Emine Hatun’nun boşandığı Ahz u kabz. Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Şeyh Ebu’l-Vefâ Câmi‘-i şerîfi kurbünde Hoca Teberrük Mahallesi’nde sâkin el-Hâc Ömerzâde el-Hâc Ahmed Ağa’nın menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde mahmiye-i mezbûrede Süleymâniye Mahallesi’nde sâkine fahrü’l-muhadderât Emine Hatun bt. el-merhûm Bahri Mehmed Ağa b. Mahmud tarafından husûs-ı âti’l-beyâna vekîl olduğu zâtını ârifân merhûm-ı mûmâ-ileyh etbâ‘ından mehterbaşı Mehmed Ağa b. Veliyüddin ve Molla Ali b. Mahmud şehâdetleriyle sâbit ve sübût-ı vekâletine hükm-i şer‘î lâhık olan Hoca Abdullah Efendi b. Mehmed meclis-i ma‘kūd-ı mezkûrda müvekkile-i mezbûrenin zevci bâ‘isü hâze’l-kitâb el-Hâc Ahmed Ağa b. el-Hâc Ahmed Ağa mahzarında bi’l-vekâle ikrâr ve takrîr-i kelâm edip mûmâ-ileyh el-Hâc Ahmed Ağa târih-i kitâb günü müvekkilem mezbûre Emine Hanım’ı bâyinen tatlîk etmekle zimmetinde mütekarrir ve ma‘kūdun-aleyh iki yüz elli guruş mehr-i müeccel ve mûmâ-ileyhin firâşından hâsıl hamli olmağla vaz‘-ı haml ile iddeti münkaziye oluncaya değin nafaka-i iddet ve meûnet-i süknâsı için bi’t-terâzî ta‘yîn olunan elli beş guruş cem‘an üç yüz beş guruşu mezbûr el-Hâc Ahmed Ağa tamamen bana edâ ve teslîm ben dahi yedinden ber-vech-i muharrer bi’l-vekâle ahz u kabz eylediğimden sonra hukūk-ı zevciyyete ve târih-i kitâba gelince sâir beynlerinde cereyân eden ahz u i‘tâya müte‘allika âmme-i de‘âvî ve mütâlebât ve eymân ve muhâsamâtdan her biri âharı ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Ali b. Mahmud ve Muhzır Hüseyin b. el-Hâc Mehmed ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 7 Rebî‘ülâhir sene [1]143. Şuhûdü’l-hâl: Ahmed Efendi b. Abdullah, Mustafa Bey b. Bahri Mehmed Ağa, Hasan Ağa b. Abdullah, Ali Ağa b. Abdullah, Halil Çelebi b. Mehmed, İbrahim Ağa b. el-Hâc Mustafa, Ahmed Efendi b. Mehmed, el-Hâc Ömer Ağa b. el-Hâc İsmail, el-Hâc Süleyman b. Abdullah, Hasan Çelebi b. Hüseyin, Bostanî Hüseyin Bey b. Mehmed.