Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 148 Hüküm no: 106 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirciler kethüdalığının yeniçerilerden es-Seyyid Osman Beşe’ye verildiği Kethüdâlık-ı esîrciyân. Dergâh-ı âlî -dâme mahfûfen bi’l-me‘âlî- yeniçerilerinin on dokuzuncu bölüğe mahsûs oda neferâtından bâ‘isü hâzihi’l-vesîka es-Seyyid Osman Beşe b. İbrahim nâm kimesne meclis-i şer‘-i şerîf-i enverde takrîr-i kelâm edip İstanbul’da esîrciler kethüdâsı olan İsmail kilâr-ı hazîne-i âmire işbu bin yüz kırk üç senesi tarîk-i hacc-ı şerîfde vefât etmekle kethüdâlık-ı mezbûre mahlûle olmağın kethüdâlık-ı mezbûr târih-i kitâb şehrinin dördüncü günü kethüdâ-yı mezbûrun fevti vâki‘ ise mahlûlünden bana tevcîh ve yedime berât-ı şerîf-i âlîşân sadaka ve ihsân buyrulmağın nazar olunup kıbel-i şer‘den yedime li-ecli’l-istihkâm vesîka i‘tâ olunmak murâdımdır dedikde berât-ı şerîf-i âlîşân ibrâz ve nazar olundukda mazmûn-ı münîfi min-külli’l-vücûh mezbûr es-Seyyid Osman’ın takrîr-i meşrûhuna mutâbık bulunmağın mûcebince kıbel-i şer‘den li-ecli’l-istihkâm işbu vesîka hıfzan li’l-makāl mâ-vaka‘a bi’t-taleb ketb olundu. Fî 10 Rebî‘ülâhir sene [1]143. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, İbrahim b. Mustafa.