Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 148 Hüküm no: 107 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mustafa Çelebi b. Sâdık b. Abdullah’ın vârislerinin arsa paylaşımında anlaştıkları Ahbartü bimâ-fîhi nemekahü’l-fakīr ileyhi azze şânühu İbrahim el-kādı bi-medîneti Kostantıniyye el-mahmiyye ufiye lehü. Husûs-ı âti’l-beyânın mahallinde ketb ü keşif ve tahrîr ü taksîmi için sâdır olan fermân-ı âlîye imtisâlen savb-ı şer‘-i enverden ba‘s ve irsâl olunan keşif nâibimiz umdetü’l-müderrisîni’l-kirâm Abdurrahman Efendi b. el-merhûm Mustafa Efendi hâssa mi‘mârlardan Ali Halîfe b. Ahmed ve Süleyman Halîfe b. Abdi ile Mahmiye-i İstanbul’da Davudpaşa Mahallesi’nde vâki‘ bir tarafdan es-Seyyid Yahya Efendi menzili ve bir tarafdan ba‘zan yine mezbûr es-Seyyid Yahya efendi menzili ve ba‘zan tarîk-i hâs ve iki tarafdan tarîk-i âm ile mahdûd iki bi’r-i mâ’yı müştemil muhterik mülk menzil arsası üzerine varıp zeyl-i vesîkada muharrerü’l-esâmî Müslimîn mahzlarında akd-i meclis-i şer‘-i şerîf ettikde arsa-yı merkūmeye bundan akdem mâlik olan Mustafa Çelebi b. Sâdık b. Abdullah fevt sulbî oğlu Zeynelâbidin ve Abdullah ve Ahmed’i terk edip kable’l-kısme Zeynelâbidin dahi fevt olup zevcesi Ümmühani bt. Receb Efendi’yi ve sulbî oğlu Hüseyin ile sulbiye kızları Rukiye ve Hanife’yi terk edip kable’l-kısme Abdullah dahi fevt olup li-ebeveyn er karındaşı mezbûr Ahmed’i terk edip kable’l-kısme Ahmed dahi fevt olup zevcesi Fâtıma bt. Mehmed’i ve sulbiye kızları Âişe ve Zeyneb ve Emetullah’ı terk edip kable’l-kısme Emetullah dahi fevt olup anası mezbûr Fâtıma’yı ve li-ebeveyn kız karındaşları mezbûretân Âişe ve Zeyneb’i li-ebeveyn ammi oğlu mezbûr Hüseyin’i terk edip kable’l-kısme Hüseyin dahi fevt olup anası mezbûre Ümmühani’yi ve sulbî sagīr oğulları Mehmed ve Zeynelâbidin ile sulbiye sagīre kızı Hadice’yi terk edip mes’ele-i mîrâsları bi-tarîkı’l-münâsaha otuz bir bin yüz dört sehmden olup arsa-yı merkūmeden sihâm-ı mezbûre i‘tibârı ile iki bin dokuz yüz seksen üç sehmi mezbûre Ümmühani’ye ve dört bin beş yüz yetmiş sekiz sehmi mezbûre Rukiye’ye ve üç bin altı yüz sehmi mezbûre Fâtıma’ya ve sekiz bin altmış dört sehmi mezbûre Âişe’ye ve yine sekiz bin altmış dört sehmi mezbûre Zeyneb’e ve bin beş yüz yirmi altışar sehmi sagīrân-ı mezbûrân Mehmed ile Zeynelâbidin’e ve yedi yüz altmış üç sehmi mezbûre Hadice’ye isâbeti tahakkukundan sonra mezbûrât Fâtıma ve Âişe ve Zeyneb’den her biri meclis-i ma‘kūd-ı mezkûrda mezbûretân Ümmühani ve Rukiye ile sıgār-ı merkūmûnun vasiyy-i muhtârları Ahmed Ağa b. Mustafa muvâcehelerinde takrîr-i kelâm ve tâ‘bir ani’l-merâm edip arsa-yı merkūmeden sihâm-ı mezkûre i‘tibârıyla hisselerimize beynimizde müşâ‘a olduğu hâlde bâkī kalan hisselerden ifrâz ve ta‘yîn ve alâmât-ı fâsıla vaz‘ıyla mümtâz ve tebyîn olunmak matlûbumuzdur dediklerinde mezbûretân Ümmühani ve Rukiye asâleten ve sıgār-ı mezbûrûnun vasiyy-i muhtârları olan mezbûr Ahmed Ağa vesâyeten hısas-ı hums-ı uhrâ-yı bâkiyyenin dahi müşâ‘a-ı hısas sülüs-i sâbıkādan ifrâz ve ta‘yîn olunmak matlûbumuzdur demeleriyle mi‘mârân-ı mezbûrân arsa-yı merkūmeye nazar ve bennâ zirâ‘ıyla mesâha ve takvîm ve tahmîn eylediklerinde mecmû‘-ı arsa altı yüz on yedi zirâ‘ on bir parmak olup ol mahallede mülk arsanın her zirâ‘ı kırk beşer akçeye alınır ve satılır deyü ahâlî-i mahalleden hâzır bi’l-meclis olanlar haber vermeleriyle mecmû‘-ı arsanın kıymeti her zirâ‘ı kırk beşer akçeden yirmi yedi bin yedi yüz seksen dört akçe ve iki bi’r-i mâ’nın kıymeti mi‘mârân-ı mezbûrân takvîmleri üzere her biri bin altı yüz altmışar akçeden üç bin üç yüz yirmi akçe ki cem‘an arsa ve bi’r-i mâ’nın kıymetleri otuz bir bin yüz dört akçe olup ve mezbûre Fâtıma’nın sihâm-ı mezbûre i‘tibârıyla arsa-yı merkūmeden üç bin altı yüz sehmi ve merkūmetân Âişe ve Zeyneb’in sihâm-ı mezkûre i‘tibârıyla arsa-yı merkūmeden sekiz bin altmış dörder [23b] [Defterde bu kısım 22b olması gerekirden 23 numarası verilmiştir. Defterin devamında herhangi bir karışıklığa mahal vermemek açısından bu sayfa 23b olarak numaralandırıldı ve bu minvalde devam edildi. (ed.)] sehmleri müşâ‘a-ı arsa-yı merkūmeden mezbûr es-Seyyid Yahya Efendi’nin menzilini vely eden cânibden dört yüz zirâ‘ on iki parmak arsa ve ol mahallede vâki‘ bi’r-i mâ’nın kıymetleri olan on dokuz bin yedi yüz yirmi sekiz akçeye mu‘âdil olmağla ol cânibden dört yüz bir buçuk zirâ‘ arsa ve bi’r-i mâ-ı mezbûr bi’t-terâzî mezbûrât Fâtıma ve Âişe ve Zeyneb için ifrâz ve ta‘yîn ve alâmât-ı fâsıla vaz‘ıyla mümtâz ve tebyîn olunup bâkī kalan iki yüz on beş zirâ‘ yirmi iki parmak arsa ile bi’r-i mâ’nın kıymetleri olan on bir bin üç yüz yetmiş altı akçe arsa-yı merkūmeden sihâm-ı mezbûre i‘tibârıyla mezbûre Ümmühani’nin iki bin dokuz yüz seksen üç sehmine ve merkūme Rukiye’nin dört bin beş yüz yetmiş sekiz sehmine ve mezbûrûn Mehmed ve Zeynelâbidin ve Hadice’nin üç bin sekiz yüz on beş sihâmına mu‘âdil olmağla bi’t-terâzî ifrâz ve ta‘yîn ve alâmât-ı fâsıla vaz‘ıyla mümtâz ve tebyîn olundukdan sonra mezbûrât Fâtıma ve Âişe ve Zeyneb hüsn-i rızâlarıyla kendi câniblerinden otuz yedi zirâ‘ arsa dahi ifrâz ve sıgār-ı mezbûrûn cânibine zam ve ilhâk edip sâniyen alâmât-ı fâsıla vaz‘ıyla mümtâz kılındıkdan sonra her biri istîfâ-yı hakka ikrâr ve biribirlerinin arsa-yı merkūmeye müte‘allika da‘vâdan zimmetlerini ibrâ ve iskāt eylediklerini mevlânâ-yı mezbûr mahallinde tahrîr ba‘dehû ma‘an ba‘s olunan es-Seyyid Ali b. es-Seyyid Mustafa ve Mustafa b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-Saferi’l-hayr sene [1]143. Şuhûdü’l-hâl: Ahmed Efendi b. Mehmed Efendi imâm-ı Şahsultan, Mustafa Efendi b. Abdülhalim imâm-ı Davudpaşa, es-Seyyid Yahya Efendi b. es-Seyyid Mehmed Efendi nâib-i Davudpaşa sâbıkā , Mehmed Odabaşı b. Abdi, Ali Odabaşı b. İsmail, Mehmed Odabaşı b. Osman, İbrahim Ağa b. el-Hâc Ali kethüdâ-yı Bedestân-ı cedîd, el-Hâc Mehmed Ağa b. Mustafa Efendi, el-Hâc Mehmed Ağa çorbacı-ı cebeciyân, Terlikçi el-Hâc Ahmed, el-Hâc Mehmed b. Ali.