Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 153 Hüküm no: 113 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Ahmed b. Abdullah’ın hür olduğu Bâ-imzâ-i hazret-i efendi, isbât-ı ıtk. Rıkk-ı sâbıkını mu‘terif olmağla zikri âtî da‘vâya kıbel-i şer‘den me’zûn olan işbu orta boylu açık kaşlı, elâ gözlü Rusiyyü’l-asl Müslimü’l-mille bâ‘isü’l-kitâb Ahmed b. Abdullah meclis-i şer‘-i hatîr-i lâzımü’t-tevkīrde kendiye rık olmak üzere vâzı‘u’l-yed olan Murad Bey b. Murad nâm kimesne mahzarında üzerine da‘vâ ve takrîr-i kelâm edip bundan akdem ben mezbûr Murad Bey’in yedinde abd-i memlûkü iken mezbûr Murad Bey târih-i kitâb senesi Saferi’l-hayrı’nın on beşinci günü beni mâlından tahrîr ve i‘tâk ve kayd-ı rıkdan ıtlâk etmişiken yine bana rık olmak üzere bi-gayr-ı hakkın vaz‘-ı yed eder suâl olunup benden kasr-ı yed ve sebîlim tahliyye olunmak üzere mezbûr Murad Bey’e tenbîh olunmak murâdımdır dedikde gıbbe’s-suâl mezbûr Murad Bey cevâbında mevsûf-i mezbûr yedinde mülkü olduğunu ikrâr lâkin ber-vech-i muharrer i‘tâk eylediğini inkâr edicek mevsûf-i mezbûr Ahmed’den ber-vech-i muharrer müdde‘âsına mübeyyine beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Büyük Karaman’da sâkin Mustafa Beşe b. Ahmed ve İbrahim Beşe b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Murad Bey târih-i kitâb senesi Saferi’l-hayrı’nın on beşinci günü işbu mevsûf-i mezbûr Ahmed’i bizim huzûrumuzda mâlından tahrîr ve i‘tâk eyledi mevsûf-i mezbûr târih-i mezkûrdan berü hürdür biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eyledikde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûf-i mezbûrun ıtkına ba‘de’l-hükm mezbûr Murad Bey’in kasr-ı yedine tenbîh ve sebîli tahliyye olunup mâ-vaka‘a bi’t-taleb ketb olundu. Fî 11 Rebî‘ülâhir sene [1]143. Şuhûdü’l-hâl: Mehmed Çelebi b. Abdullah, Mehmed Ağa b. Mehmed kethüdâ-yı muhzırân, es-Seyyid Ahmed Efendi, es-Seyyid Mustafa Efendi.