Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 154 Hüküm no: 114 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Zübeyde bt. es-Seyyid Selim’in evini Ahmed Ağa b. Hüseyin’e sattığı Mübâ‘ya‘a. Fi’l-asl medîne-i İzmir mahallâtından Hatuniyye Mahallesi ahâlîsinden olup Mahmiye-i İstanbul’da Koca Mustafapaşa Mahallesi’nde sâkine zâtı Davud Ağa b. Hüseyin ve Abdullah b. Abdülbâki ta‘rîfleriyle mu‘arrefe olan Şerife Zübeyde bt. es-Seyyid Selim nâm hatun meclis-i şer‘-i şerîfde bâ‘isü hâze’l-kitâb Ahmed Ağa b. Hüseyin nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan İbrahim Çelebi ve bir tarafdan Hüseyin Çelebi ve bir tarafdan es-Seyyid Mustafa Çelebi mülkleri ve bir tarafdan tarîk-i âm ile mahdûd bir bâb fevkānî oda ve bir sofa ve tahtânî bir oda ve bir mikdâr bahçe ve havlu ve kenîfi muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz kırk dört guruşa mezbûr Ahmed Ağa’ya bey‘ ve temlîk ve mahallinde kabz ve tesellüm [ve] taslît ve semen-i mezbûrun yüz kırk dört guruşunu mezbûr Ahmed Ağa’ya cihet-i karzdan zimmetimde deynim olan yüz kırk dört guruşa takās ve mahsûb eylediğimde ol dahi ber-vech-i muharrer iştirâ ve temellük ve mukāssa ve kabûl eylediğinden sonra semen-i mezbûrdan bâkī kalan yüz guruşu yedinden tamamen ahz u kabzeyledim. Fîmâ ba‘d menzil-i mahdûd-ı mezkûr merkūm Ahmed Ağa’nın mülk-i müşterâsı olup kat‘â benim alâka ve medhalim kalmadı. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Rebî‘ülâhir sene [1]143. Şuhûdü’l-hâl: Hüseyin Ağa b. Ahmed, Halil Çelebi b. Abdullah, Ahmed Çelebi b. Abdullah, Ahmed Beşe b. Hüseyin, Davud Ağa b. Hüseyin, Mustafa Efendi b. Yunus, Nurullah Çelebi b. Mustafa, Molla Ali b. Mahmud, Mehmed Çelebi b. Abdullah.