Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 155 Hüküm no: 116 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerafeddin Paşa Vakfı’nda hisseleri olanların aralarındaki davada anlaştıkları Husûs-ı âti’z-zikrin mahallinde ketb ü tahrîri bi’l-iltimâs savb-ı şer‘-i kavîmden irsâl olunan Mustafa Efendi b. el-merhûm Yunus Efendi merhûm Şerafeddin Paşa Vakfı’na evlâdiyet ve meşrûtiyyet üzere mütevelliye olup mahmiye-i İstanbul’da merhûm Haseki Sultan Câmi‘-i şerîfi kurbünde sâkine Şerife Emine Hatun bt. es-Seyyid Davud Efendi’nin menziline varıp zeyl-i kitâbda mastûrü’l-esâmî Müslimîn mahzarlarında akd-i meclis-i şer‘-i şerîf ettikde vâkıf-ı mûmâ-ileyh evlâdından es-Seyyid Mustafa ve es-Seyyid Mehmed’den her biri asâleten ve Şerife Âişe [Emine] bt. es-Seyyid Davud Efendi b. es-Seyyid Ömer nâm hatunun zevci ve tarafından husûs-ı âti’z-zikri ikrâra vekîl olduğu zâtını ârifân Ali Bey b. Mustafa ve Mehmed Hoca b. Ali şehâdetleriyle sâbit ve sübût-ı vekâletine hükm-i şer‘î lâhık olan el-Hâc Halil b. İsmail meclis-i ma‘kūd-ı mezkûrda vakf-ı mezbûra ber-vech-i muharrer mütevelliye olan bâ‘isetü hâzihi’l-vesîka mezbûre Şerife Emine Hatun târih-i kitâba gelince altı seneden berü vakf-ı mezbûra mütevelliye olup vâkıf-ı mûmâ-ileyhin Balıkesir’de vâki‘ iki bâb hamam ve bir dükkân ve Bayındır nâm karye mahsûlâtını ahz u kabz ve mesârif lede’l-hükkâmi’ş-şer‘ muvâcehemizde hesâb olundukda mütevelliye-i mezbûrenin vakf-ı mezbûrda dört bin akçesi zuhûr etmeğin min-ba‘d mütevelliye-i mezbûrenin kendi ve zikr olunan Balıkesir’de sâkin vekîli Mehmed Ağa’nın vakf-ı mezbûra müte‘allik umûruna müdâhale ve ta‘arruz etmemek üzere ta‘ahhüd eylediğimizde ol dahi vakt ü zamânıyla vakf-ı mezbûr mahsûlâtından ba‘de’l-ihrâci’l-mesârif ber-mûceb-i şart-ı vâkıf hisselerimizi bi’t-tevliye her birimize def‘ teslîme ta‘ahhüd eyledi vakf-ı mezbûr umûruna müte‘allika birbirimiz ile kat‘â da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Molla Ali b. Mahmud ve Ahmed b. Mustafa nâm kimesneler ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Rebî‘ülâhir sene 1143. Şuhûdü’l-hâl: es-Seyyid Osman b. Mustafa, Mehmed Hoca b. Ali, Molla Ali b. Mahmud, Ahmed Ağa b. Abdullah, İbrahim Çelebi b. Mehmed, Ali Ağa b. Abdullah, Ahmed Odabaşı b. Abdullah, Mustafa Ağa b. Abdullah.